بڑی اپوزیشن جماعتوں کے بینک اکاؤنٹس فریز کرکے حکومت کی جمہوریت پر تالا بندی: کانگریس

 نئی دہلی، 16 فروری ( یو این آئی ) کانگریس نے پارٹی کے بینک کھاتوں کو سیل کرنے پر گہری تشویش کا اظہار کرتے ہوئے کہا ہے کہ اس کے کھاتوں کو سیل کرکے حکومت نے دنیا کی سب سے بڑی جمہوریت پر بیڑیاں ڈال دی ہیں۔

کانگریس کے خزانچی اجے ماکن نے جمعہ کو یہاں پارٹی ہیڈکوارٹر میں ایک پریس کانفرنس میں بتایا کہ دو دن پہلے کانگریس اور یوتھ کانگریس کے بینک کھاتوں کو سیل کر دیا گیا ہے اور ان کھاتوں سے چیک جمع کرنے اور رقم نکالنے پر پابندی عائد کر دی گئی ہے۔

مسٹر ماکن نے کہا ’’ہندوستان میں جمہوریت پوری طرح  ختم ہو چکی ہے۔ ملک کی بڑی  اپوزیشن جماعت کے تمام اکاؤنٹس منجمد کر دیے گئے ہیں۔ کانگریس کے کھاتوں پر تالا بندی کردی گئی ہے۔ یہ کانگریس پارٹی کے کھاتے فریز نہیں ہوئے، ملک کی جمہوریت فریز ہو گئی ہے۔

انہوں نے کہا کہ مودی حکومت نے عام انتخابات کے اعلان سے صرف دو ہفتے قبل سوچ سمجھ کر یہ قدم اٹھایا ہے۔ یہ معاملہ پانچ سال پہلے کا ہے، جب پارٹی کو انکم ٹیکس جمع کرنے میں کچھ دن کی تاخیر  ہوگئی تھی اور اس کے بدلے میں 210 کروڑ روپے   انکم ٹیکس کے طور پر مانگتے ہوئے  پارٹی کے بینک کھاتے  سیل کر دیئے گئے ہیں۔

کانگریس لیڈر نے کہا کہ انتخابات کے اعلان سے عین قبل اہم اپوزیشن پارٹی کے بینک کھاتوں کو سیل کرکے حکومت نے ملک میں جمہوریت کا قتل کیا ہے اور یہ تاثر دیا ہے کہ بی جے پی حکومت ملک میں یک جماعتی نظام حکومت قائم کرنا چاہتی ہے۔

انہوں نے کہا کہ کانگریس اور یوتھ کانگریس کے جن کھاتوں کو سیل کیا گیا ہے، ان میں 25 کروڑ روپے سے کم رقم ہے جو کراؤڈ فنڈنگ کے ذریعے جمع کی گئی ہے۔ انہوں نے کہا کہ اس رقم کا 95 فیصد 100، 200 روپے یکجا کرکے آیا ہے۔

افسوسناک بات یہ ہے کہ یوتھ کانگریس کے کھاتے میں ممبر شپ کا پیشہ  جمع ہے،  جبکہ دوسری طرف، بی جے پی کے کھاتے میں بانڈز کے ذریعے کارپوریٹس کی رقم جمع ہے، جسے سپریم کورٹ نے غیر آئینی قرار دیا ہے۔ اب بھی اس کے اکاؤنٹس چل رہے ہیں۔ یہ جمہوریت کے قتل اور ملک میں جمہوریت کو ختم کرنے کی سازش ہے۔

مسٹر ماکن نے کہا کہ بی جے پی حکومت کی یہ کارروائی ظاہر کرتی ہے کہ وہ جمہوریت کو تباہ کرنا اور یک جماعتی نظام چلانا چاہتی ہے۔ وہ حزب اختلاف کی جماعتوں کے بینک اکاؤنٹس سیل کرکے اور انہیں بیڑیوں میں جکڑ کر  جمہوریت پر تالا لگا رہی ہے۔ انہوں نے کہا کہ پارٹی نے اس سلسلے میں شکایت درج کرائی ہے اور اب اس کے خلاف سڑکوں پر آکر احتجاج کیا جائے گا۔