دوبارہ امریکی صدر بننے کیلئے جو بائیڈن کی عمر بہت زیادہ ہو چکی ہے: سروے رپورٹ

ایک حالیہ سروے کے مطابق زیادہ تر امریکی لوگوں کا خیال ہے کہ دوبارہ امریکی صدر بننے کے لیے جو بائیڈن کی عمر بہت زیادہ ہے۔حال ہی میں خصوصی وکیل رابرٹ ہر نے اپنی رپورٹ میں جو بائیڈن کو ’نیک خیالات کا مالک کمزور یادداشت والا بزرگ‘ قرار دیا تھاجس کے بعد اب امریکی میڈیا کے سروے میں یہ بات سامنے آئی ہے کہ امریکا میں 59 فیصد لوگوں کا خیال ہے کہ جو بائیڈن اور ڈونلڈ ٹرمپ دونوں کی ہی امریکی صدارتی عہدہ سنبھالنے کے حساب سے عمر بہت زیادہ ہے۔

اس سروے کے مطابق، 27 فیصد لوگوں کا خیال ہے کہ صرف جو بائیڈن کی عمر دوبارہ امریکی صدر منتخب ہونے کے حساب سے زیادہ ہے جبکہ صرف 3 فیصد لوگ ایسے ہیں جنہوں نے کہا کہ صرف ڈونلڈ ٹرمپ کی عمر دوبارہ امریکی صدر بننے کے حساب سے زیادہ ہے۔

یوں مجموعی طور پر 86 فیصد امریکیوں کا خیال ہے کہ جو بائیڈن کی عمر دوبارہ امریکا کا صدر بننے کےحساب سے بہت زیادہ ہے۔

یہ سروے جو بائیڈن کی انتخابی مہم کے لیے تازہ ترین دھچکا ہے جو اس خیال کو دور کرنے کے لیے جوش و خروش سے چلائی جا رہی ہے کہ جو بائیڈن کے پاس اب زیادہ عمر ہونے کی وجہ سے مؤثر طریقے سے امریکی صدارتی عہدہ سنبھالنے کی صلاحیت نہیں ہے۔