لوک سبھا انتخابات کی کل سہ پہر 3 بجے الیکشن کمیشن کی پریس کانفرنس

الیکشن کمیشن آف انڈیا (ای سی آئی) کل سہ پہر تین بجے ایک پریس کانفرنس میں لوک سبھا انتخابات کی تاریخوں کا اعلان کرے گا۔ ای سی آئی اوڈیشہ، سکم، اروناچل پردیش اور آندھرا پردیش میں ہونے والے اسمبلی انتخابات کی تاریخوں کا بھی اعلان کرے گا۔

خبر رساں ایجنسی اے این آئی نے رپورٹ کیا کہ عام انتخابات 2024 اور کچھ ریاستی اسمبلیوں کے شیڈول کا اعلان کرنے کے لیے الیکشن کمیشن کل 16 مارچ کو سہ پہر 3 بجے ایک پریس کانفرنس منعقد کرے گا۔ اسے ECI کے سوشل میڈیا پلیٹ فارمز پر لائیو سٹریم کیا جائے گا۔ لوک سبھا انتخابات سات سے آٹھ مرحلوں میں ہونے کی امید ہے۔

قبل ازیں چیف الیکشن کمشنر راجیو کمار نے بدھ کو یہاں کہا کہ الیکشن کمیشن جموں و کشمیر میں سیکورٹی کی صورتحال اور اسٹیک ہولڈرز کی رائے کا جائزہ لینے کے بعد لوک سبھا اور اسمبلی انتخابات ایک ساتھ یا الگ الگ کرانے کا فیصلہ کرے گا۔ انہوں نے یونین ٹیریٹری میں اسمبلی انتخابات کے انعقاد میں تاخیر سے متعلق تنقید کو بھی مسترد کیا اور کہا کہ حد بندی اور ضروری قانون سازی کا عمل دسمبر 2023 تک ہی مکمل کیا گیا ہے۔ “ضروری عمل دسمبر 2023 میں مکمل کیا گیا تھا اور اب یہ مارچ کا مہینہ ہے،” انہوں نے آئندہ پارلیمانی انتخابات کی تیاریوں کا جائزہ لینے کے لیے جموں و کشمیر کے اپنے تین روزہ دورے کے اختتام سے قبل صحافیوں کو بتایا۔