کولکتہ میں مسافر ٹرین اور مال گاڑی میں تصادم، 15 مسافر ہلاک اور متعدد زخمی

حادثہ صبح 9 بجے کے وقت پیش آیا، مال گاڑی سے تصادم کے بعد مسافر ٹرین کی تین بوگیاں پٹری سے اتر گئیں:
کولکتہ میں مسافر ٹرین اور مال گاڑی میں تصادم سے 15 افراد ہلاک اور متعدد زخمی ہوگئے۔

میڈیا کے مطابق ریاست مغربی بنگال کے شہر کولکتہ میں ٹرینوں کے درمیان تصادم کا حادثہ پیر کے روز پیش آیا جہاں رنگاپانی اسٹیشن کے قریب مسافر ٹرین کنچن جنگا ایکسپریس اور مال گاڑی میں تصادم ہوا جس کے نتیجے میں اب تک 15 مسافروں کی ہلاکت کی تصدیق ہوچکی ہے جب کہ 50 سے زائد افراد زخمی ہیں، مرنے والوں میں 3 ریلوے ملازم بھی شامل ہیں۔

 میڈیا کا بتانا ہےکہ حادثہ صبح 9 بجے کے وقت پیش آیا، مال گاڑی سے تصادم کے بعد مسافر ٹرین کی تین بوگیاں پٹری سے اتر گئیں، حادثے میں زیادہ تر ہلاکتیں ایک بوگی کو شدید نقصان کی وجہ سے ہوئیں۔
ریلوے حکام کے مطابق حادثے کی اطلاع ملتے ہی ریسکیو اہلکاروں نے جائے حادثہ پر پہنچ کر امدادی کارروائیاں شروع کیں، حادثے کے تمام زخمیوں کو اسپتال منتقل کردیا گیا ہے جہاں انہیں طبی امداد فراہم کی جارہی ہے۔