اتر پردیش سمیت 3 ریاستوں میں ضمنی انتخاب کی تاریخ تبدیل، 13 نومبر کی جگہ 20 نومبر کو ڈالے جائیں گے ووٹ

الگ الگ تہواروں کی وجہ سے اتر پردیش کے علاوہ کیرالہ اور پنجاب میں کئی اسمبلی سیٹوں پر ضمنی انتخاب کے لیے مقرر 13 نومبر کی تاریخ میں تبدیلی کی گئی ہے، اب یہاں 20 نومبر کو ووٹ ڈالے جائیں گے۔

الیکشن کمیشن نے اتر پردیش سمیت 3 ریاستوں میں ہونے والے ضمنی انتخابات کی تاریخ میں تبدیلی کا اعلان کیا ہ ے۔ پیر کے روز الیکشن کمیشن نے اس سلسلے میں جانکاری دیتے ہوئے بتایا کہ اتر پردیش، کیرالہ و پنجاب میں 13 نومبر کی جگہ اب 20 نومبر کو ووٹ ڈاے جائیں گے۔

دراصل بی جے پی سمیت کئی اہم پارٹیوں نے مطالبہ کیا تھا کہ مذکورہ ریاستوں میں ووٹنگ کی تاریخ تبدیل کی جائے کیونکہ تہواروں کے سبب لوگوں کو حق رائے دہی کا استعمال کرنے میں پریشانی لاحق ہو سکتی ہے۔ اسی گزارش کو پیش نظر رکھتے ہوئے الیکشن کمیشن نے اتر پردیش، پنجاب و کیرالہ میں ضمنی انتخاب 20 نومبر کو کرانے کا فیصلہ کیا۔ ووٹوں کی گنتی پہلے سے مقرر تاریخ یعنی 23 نومبر کو ہی ہوگی۔

میڈیا رپورٹس کے مطابق بی جے پی، کانگریس، بی ایس پی، آر ایل ڈی کے علاوہ کئی دیگر قومی و ریاستی پارٹیوں کی گزارش پر الیکشن کمیشن نے ووٹنگ کی تاریخ میں یہ تبدیلی کی ہے۔ سیاسی پارٹیوں کی طرف سے یہ اندیشہ ظاہر کیا گیا تھا کہ تہواروں کی وجہ سے 13 نومبر کو ہونے والی ووٹنگ کا فیصد کم ہو سکتا ہے۔

قابل ذکر ہے کہ اتر پردیش کی 10 خالی پڑی سیٹوں میں سے 9 سیٹوں پر ضمنی انتخاب ہو رہا ہے، جبکہ پنجاب اسمبلی کی 4 سیٹوں پر ضمنی انتخاب ہونے والا ہے۔ علاوہ ازیں کیرالہ میں وائناڈ لوک سبھا سیٹ اور 2 اسمبلی سیٹوں پر بھی ضمنی انتخاب 13 نومبر کو ہونا تھا جو اب 20 نومبر کو ہوگا

الیکشن کمیشن کی طرف سے مقررہ پروگرام کے مطابق ان 3 ریاستوں سمیت مجموعی طور پر 15 ریاستوں کی 48 خالی پڑی اسمبلی سیٹوں پر ضمنی انتخابات کرائے جا رہے تھے۔ اس کے علاوہ خالی پڑی لوک سبھا کی 2 سیٹوں پر بھی ووٹنگ کرائی جانی تھی۔ ان سبھی کے لیے ووٹنگ کی تاریخ 13 نومبر مقرر کی گئی تھی۔ لیکن اب اتر پردیش، پنجاب و کیرالہ میں ووٹنگ کی تاریخ بدل کر 20 نومبر کر دی گئی ہے، بقیہ ریاستوں میں 13 نومبر کو ہی ووٹ ڈالے جائیں گے۔