آگرہ-لکھنؤ ایکسپریس وے پر بس اور ٹرک میں حادثہ، ایک مسافر ہلاک، 15 سے زائد زخمی

فیروز آباد: اتر پردیش کے فیروز آباد ضلع میں ایک المناک سڑک حادثے میں ایک شخص ہلاک جبکہ 15 سے زائد افراد زخمی ہو گئے۔ یہ واقعہ ناصر پور تھانہ حدود میں آگرہ-لکھنؤ ایکسپریس وے پر پیش آیا جہاں تیز رفتار ٹریولر بس، جو مسافروں سے بھری ہوئی تھی، ایک کھڑے ہوئے ٹرک سے جا ٹکرائی۔ ٹکر اتنی شدید تھی کہ بس کا اگلا حصہ بری طرح تباہ ہو گیا۔

ذرائع کے مطابق، حادثے کے بعد پولیس اور ایمرجنسی سروسز فوری طور پر جائے حادثہ پر پہنچ گئیں اور تمام زخمیوں کو ابتدائی طبی امداد کے بعد قریبی اسپتال منتقل کیا گیا۔ حکام نے بتایا کہ بس میں 17 مسافر سوار تھے جو گجرات کے علاقے دادرا نگر حویلی سے تعلق رکھتے تھے اور ایودھیا سے متھرا کی زیارت کے لیے جا رہے تھے۔

اسپتال کے ڈاکٹروں نے بتایا کہ حادثے میں تین افراد کی حالت تشویشناک ہے اور انہیں فیروز آباد کے ضلعی اسپتال ریفر کیا گیا ہے۔ جاں بحق مسافر کی لاش کو پوسٹ مارٹم کے لیے بھیج دیا گیا ہے۔

واضح رہے کہ اکتوبر میں بھی یوپی کے کانپور میں ایک ہولناک سڑک حادثہ پیش آیا تھا جس میں پانچ افراد جان کی بازی ہار گئے تھے۔ اس حادثے میں تیز رفتار ڈمپر نے اچانک بریک لگا دی تھی جس کے باعث پیچھے چلنے والی کار اس سے ٹکرا گئی اور دو ٹرکوں کے درمیان کچلی گئی۔