سعودی عرب: ’مکہ اور مدینہ‘ الفاظ کے تجارتی استعمال سے قبل منظوری لینا لازم قرار

سعودی عرب میں مناسب رجسٹریشن کے بغیر یا قواعد و ضوابط کی خلاف ورزی کرتے ہوئے کسی دوسرے رجسٹرڈ تجارتی نام کو استعمال کرنے پر اب 15 ہزار ریال (11 لاکھ 15 ہزار پاکستانی روپے سے زائد) تک کا جرمانہ ہوگا، مقدس شہروں کے نام استعمال کرنے سے قبل منظوری لینا بھی لازم قرار دیا گیا ہے۔

گلف نیوز کی رپورٹ کے مطابق سعودی عرب وزارت تجارت نے قواعد و ضوابط کے مسودے کو حتمی شکل دینے سے پہلے استالہ پلیٹ فارم پر عوامی مشاورت کے لیے شائع کیا ہے۔

17 ستمبر، 2024 کو وزرا کی کونسل کے ذریعے منظور کردہ تجارتی نام قانون کے تحت ہر تاجر کو رجسٹرڈ تجارتی نام اپنانے کی ضرورت ہوتی ہے۔

خلاف ورزیوں میں کسی دوسرے تاجر کا محفوظ یا رجسٹرڈ تجارتی نام استعمال کرنا شامل ہے، جس پر 10 ہزار ریال (ساڑھے 7 لاکھ پاکستانی روپے سے زائد) جرمانہ عائد ہوتا ہے۔

مزید برآں، ممنوعہ تجارتی ناموں جیسے سیاسی، فوجی یا مذہبی ناموں کو رجسٹر کرنے یا استعمال کرنے کی کوشش کرنے والے تاجروں کو 15 ہزار ریال (11 لاکھ 15 ہزار پاکستانی روپے سے زائد) جرمانے کا سامنا کرنا پڑے گا۔

شہر کے ناموں پر کاروبار ؟
اس قانون کے تحت ایسے تجارتی ناموں کی سختی سے ممانعت کی گئی ہے جو مقامی، علاقائی یا بین الاقوامی تنظیموں سے ملتے جلتے ہوں، سیاسی، مذہبی یا فوجی حوالہ جات پر مشتمل ہوں، امن عامہ یا اخلاقیات کی خلاف ورزی کرتے ہوں، یا عالمی سطح پر تسلیم شدہ ٹریڈ مارک یا سعودی عرب میں ایک معروف رجسٹرڈ ٹریڈ مارک سے ملتے جلتے ہوں۔

تجارتی نام جن میں سعودی عرب شامل ہیں، نیز شہروں، علاقوں اور عوامی مقامات کے نام، سخت شرائط کے تحت رجسٹر کیے جاسکتے ہیں، بشرطیکہ وہ کسی سرکاری ادارے سے قریبی مماثلت نہ رکھتے ہوں۔

مزید برآں، تجارتی ناموں میں مکہ یا مدینہ کے ناموں کے استعمال کے لیے مکہ شہر اور مقدس مقامات کے لیے رائل کمیشن یا مدینہ ریجن ڈیولپمنٹ اتھارٹی سے پیشگی منظوری کی ضرورت ہوگی۔

قواعد و ضوابط، خلاف ورزیوں کو سنگین اور غیر سنگین جرائم میں تقسیم کرتے ہیں، جس میں غیر سنگین خلاف ورزیوں پرایک ہزار ریال (76 ہزارپاکستانی روپے) سے 5 ہزار ریال (پونے چار لاکھ پاکستانی روپے سے زائد) کے درمیان جرمانہ عائد ہوتا ہے۔

ان میں کاروباری دستاویزات، خط و کتابت، یا تشہیری مواد پر تجارتی نام ظاہر کرنے میں ناکامی، اسٹور فرنٹ یا کاروباری احاطے پر تجارتی نام ظاہر کرنے میں ناکامی، پچھلے نام کو حذف کرنے کے بعد قانونی ٹائم فریم کے اندر نیا تجارتی نام رجسٹر کرنے میں ناکامی، اور تجارتی نام کو گمراہ کن یا غیر قانونی طریقے سے استعمال کرنا شامل ہیں۔

وزارت تجارت سعودی عرب نے تجارتی نام سے متعلق خدمات کے لیے فیس مقرر کی ہے، عربی میں تجارتی نام حاصل کرنے کی قیمت 200 سعودی ریال (تقریباً 15 ہزار پاکستانی روپے) ہے، جب کہ انگریزی میں ایک نام مختص کرنے کی قیمت 500 سعودی ریال (38 ہزار روپے سے زائد) ہے۔

ریزرویشن کی مدت میں توسیع یا تجارتی نام کی ملکیت منتقل کرنے کی فیس 100 ریال (7 ہزار 600روپے) ہے۔

ایک جائزہ کمیٹی تجارتی نام کی خلاف ورزیوں کی نگرانی کرے گی، اور جرمانے عائد کرے گی، جس میں جرم کی شدت اور اس میں شامل کاروبار کے سائز کی بنیاد پر جرمانے کو ایڈجسٹ کرنے کا اختیار ہوگا۔