پرمود تیواری کے فرخ آباد و اکبرپورمیں عوامی جلسے آج

لکھنؤ۔(نامہ نگار)۔ ریاست میں پارلیمانی انتخابات میں کانگریس پارٹی کے سینئر لیڈران و اہم لیڈر کانگریس امیدواروں کی حمایت میں ۱۹؍اپریل کو مختلف پارلیمانی حلقوں میں منعقدہ عوامی جلسوں کو خطاب کریں گے۔ مذکورہ اطلاع دیتے ہوئے ریاستی کانگریس کے ترجمان وریندر مدان نے بتایا کہ رکن پارلیمنٹ پرمود تیواری فرخ آباد میں اور کانپور میں کانگریس امیدوار کی حمایت میں عوامی جلسوں کوخطاب کریں گے۔ انہوں نے بتایا کہ آل انڈیا کانگریس کمیٹی کے سابق سکریٹری و سابق رکن پارلیمنٹ دہلی جے کشن لکھنؤ پارلیمانی حلقہ میں مختلف عوامی جلسوں کو خطاب کریں گے۔ اس سلسلہ میں کانگریس پارٹی کی امیدوار و اداکارہ نغمہ آگرہ، ہردوئی اور بارہ بنکی میں کانگریس امیدوار کی حمایت میں عوامی ریلی سے خطاب کریں گی۔ پارٹی کے سابق وزیر رام کرشن دیویدی بستی پارلیمانی حلقہ میں کانگریس امیدوار کے ذریعہ نامزدگی کے موقع پر شامل ہوں گے۔ ریاستی کانگریس کے نائب صدرراجیش پتی ترپاٹھی و سابق وزیر وریندر سنگھ چندولی پارلیمانی حلقہ کے کانگریس امیدوار کے نامزدگی کے موقع پر موجود رہیں گے۔