بہار میں سی بی آئی نے چھاپہ مارا-ریلوے کے انجینئروں سمیت 4 گرفتار، کروڑوں کا سامان و چوری کا مال ضبط

وسط مشرقی ریلوے کے مختلف ڈویژنوں میں انجینئرنگ محکمہ کے افسروں کے ذریعہ بڑے پیمانے پر لوہا چوری کرکے لاکھوں روپے کی ناجائز کمائی کرنے کا معاملہ سامنے آیا ہے۔

سی بی آئی پٹنہ کی ٹیم نے اس معاملے میں دو الگ الگ جگہوں پر چھاپہ ماری کرکے 2 سینئر سیکشن انجینئر سمیت 4 کو گرفتار کرلیا ہے۔

اس میں سونپور ریل ڈویژن کے حاجی پور میں تعینات سینئر سیکشن انجینئر سنجے کمار اور پنڈت دین دیال اپادھیائے ریل ڈویژن کے ڈہری اون سون میں تعینات سینئر سیکشن انجینئر راج کمار کو گرفتار کیا گیا ہے۔ وہاں کنٹرکشن کا اسٹور ہے۔ چھاپہ ماری کے دوران ایک ٹرک لوہا بھی ضبط کیا گیا۔

بتایا جاتا ہے کہ جمعرات کو پوری رات سی بی آئی کی ٹیم جانچ میں لگی رہی۔ وہاں سے گارڈ ونود کمار کو بھی گرفتار کیا گیا ہے۔ اس معاملے میں ریلوے سیکوریٹی فورسز کی بھی لاپروائی سامنے آئی ہے۔ بغیر آر پی ایف سے حکم لیے ریلوے کا لوہا چوری چھپے فروخت کرکے ریل افسر کمائی کر رہے تھے۔

اطلاع کے مطابق سینئر سیکشن انجینئر نجی شخص کے کھاتے میں پیسے منگواتا تھا۔ اس کے بعد اپنے کھاتے میں منتقل کرا لیتا تھا۔ کئی بار نقد رقم لینے کے بھی ثبوت ملے ہیں۔

ڈہری اون سون میں سی بی آئی کی ٹیم نے آدھی رات کو چھاپہ ماری کی اور سینئر سیکشن انجینئر کو گرفتار کر پٹنہ لے گئی۔ اس واقعہ سے جڑے دو ریٹائر سینئر سیکشن انجینئر پر بھی لوہا چوری کرنے کا الزام ہے۔ دونوں نے ایک کروڑ سے زیادہ کی کمائی کی ہے۔ ان کو نوٹس بھیج کر پوچھ تاچھ کی جائے گی۔

ریلوے کے مہندرو واقع محکمہ تعمیرات سے بھی چوری کے تاڑ جڑے ہیں۔ سی بی آئی کی ٹیم وہاں بھی جلد جانچ کرے گی۔ اپریل 2024 میں سبکدوش سینئر سیکشن انجینئر انل سنگھ سے بھی پوچھ تاچھ ہوگی۔

وہ ابھی ہریانہ کے گڑگاؤں میں رہ رہے ہیں۔ اس کے ساتھ جنوری 2025 میں سبکدوش ہوئے سینئر سیکشن انجینئر چوبے اور ان کے ڈرائیور انو کمار سے بھی پوچھ تاچھ ہوگی۔ ڈرائیور کے اکاؤنٹ میں پیسہ لے کر انجینئر کے کھاتے میں منتقل کرنے کا الزام ہے۔

سینئر سیکشن انجینئر راج کمار کو ڈہری اون سون سے گرفتار کرنے کے بعد سی بی آئی نے وہاں سے ایک ٹرک بھی ضبط کیا ہے۔ اس پر بہار، اتر پردیش دونوں کا نمبر ہے۔ ٹرک کی تصدیق کرائی جا رہی ہے۔