کانپورمیں رات گئے پانچ منزلہ عمارت میں زبردست آگ لگ گئی، شوہر، بیوی اور تین بچوں کی موت

کانپور: چمن گنج تھانہ علاقے کے تحت ایک پانچ منزلہ عمارت میں اتوار کی دیر رات آگ لگ گئی۔ آگ کو پھیلنے میں کافی وقت لگا۔ آگ اور دھواں بڑھ رہا تھا اور مقامی لوگوں نے اس واقعہ کی اطلاع فائر بریگیڈ ٹیم اور پولیس کو دی۔

اطلاع ملتے ہی فائر بریگیڈ موقع پر پہنچ گئی، اور چھ سے زائد گاڑیاں آگ بجھانے میں مصروف ہیں۔ اس واقعے میں میاں بیوی اور تین بچوں سمیت 5 افراد کے ہلاک ہونے کی اطلاعات ہیں۔

جانکاری کے مطابق چمن گنج تھانہ علاقہ کے تحت پریم نگر میں اتوار کی رات ایک 5 منزلہ عمارت میں اچانک آگ لگ گئی۔ کچھ ہی دیر میں آگ نے خوفناک شکل اختیار کر لی۔ آگ کے دھویں اور بلند شعلوں کو دیکھ کر پورے علاقے میں خوف وہراس پھیل گیا۔ لوگ گھروں سے باہر نکل آئے۔ اطلاع ملنے پر پولیس اور فائر بریگیڈ کی ٹیم نے آگ بجھانے کا کام شروع کردیا۔

بتایا جا رہا ہے کہ عمارت کی پہلی اور دوسری منزل پر جوتے بنانے کا کارخانہ چل رہا ہے جبکہ خاندان کے افراد تیسری اور چوتھی منزل پر رہتے ہیں۔ آگ لگتے ہی عمارت میں رہنے والے کچھ لوگ کسی طرح بچ نکلنے میں کامیاب ہو گئے تاہم کئی لوگ عمارت میں پھنسے رہے۔

فائر بریگیڈ کی 6 سے زائد گاڑیاں موقع پر پہنچ گئیں۔ اطلاع ملتے ہی کئی اعلیٰ پولیس افسران بھی وہاں پہنچ گئے۔ اس کے ساتھ ہی فائر فائٹرز عمارت میں پھنسے لوگوں کو بچاتے ہوئے آگ بجھانے کی کوشش کرتے رہے۔ افسوسناک بات یہ ہے کہ پانچ افراد کی جان نہ بچائی جا سکی۔

اس معاملے میں چیف فائر آفیسر دیپک شرما نے بتایا کہ جیسے ہی چمن گنج تھانہ علاقے میں آگ لگنے کی اطلاع کنٹرول روم میں ملی، تقریباً 6 فائر بریگیڈ کی گاڑیاں روانہ کی گئیں۔ بتایا گیا کہ رات دیر گئے آتشزدگی کے اس واقعہ میں پانچ لوگوں کی موت ہو گئی۔

جس میں شوہر، بیوی اور تین بچے شامل ہیں۔ بتایا گیا کہ آگ نے کچھ ہی دیر میں اتنی خوفناک شکل اختیار کر لی کہ پھنسے ہوئے لوگوں کو بچایا نہ جا سکا۔ جوتے اور چپل بنانے میں استعمال ہونے والا محلول بڑی مقدار میں گھر میں رکھا گیا تھا۔ جس کی وجہ سے آگ پھیلتی رہی اور ایک بڑا حادثہ پیش آیا۔