سی بی ایس ای نے 12ویں کے نتائج کا اعلان کیا، 88.39 فیصد طلباء کامیاب

 نئی دہلی : سینٹرل بورڈ آف سیکنڈری ایجوکیشن (سی بی ایس ای) نے منگل کو 12ویں جماعت کے نتائج کا اعلان کر دیا، جس میں 88.39 فیصد طلباء کامیاب ہوئے ہیں۔

اس سال 12ویں کے امتحان میں 88.39 فیصد طلبا کامیاب ہوئے ہیں، جو گزشتہ سال کے مقابلے میں 0.41 فیصد زیادہ ہے۔ اس سال 12ویں کے امتحان میں 91 فیصد طالبات کامیاب ہوئی ہیں، جبکہ طلباء کی کامیابی کا تناسب 85.06 فیصد رہا۔

12ویں کے امتحان میں شامل ہونے والے طلبا اپنے نتائج سی بی ایس ای کی سرکاری ویب سائٹس(cbseresults.nic.in, cbse.gov.in, results.cbse.nic.in)   پر جا کر دیکھ سکتے ہیں۔ اس کے علاوہ ڈیجی لاکر ایپ، اُمنگ ایپ اور ایس ایم ایس سروس کے ذریعے بھی نتائج  دیکھے جاسکتے ہیں ۔ نتائج دیکھنے کے لیے طلبا کو اپنا رول نمبر، اسکول نمبر، ایڈمٹ کارڈ آئی ڈی اور تاریخ پیدائش درج کرنا ہوگا۔

واضح رہے کہ سی بی ایس ای بورڈ میرٹ لسٹ جاری نہیں کرتا۔ اس کے علاوہ نتائج میں کوئی ٹاپر کابھی اعلان نہیں کیا جاتا۔ بورڈ تمام اسکولوں اور تعلیمی اداروں کو یہ ہدایت بھی دیتا ہے کہ کسی بھی بچے کو اسکول یا ضلع کا ٹاپر اعلان نہ کیا جائے۔