دوسہ میں پک اپ اور کنٹینر میں خوفناک تصادم، 11 افراد ہلاک، متعدد زخمی

دوسہ: دوسہ ضلع میں بدھ کی صبح ایک خوفناک سڑک حادثے نے پورے علاقے کو ہلا کر رکھ دیا۔ دوسہ منوہپور روڈ پر باپی کے قریب کنٹینر اور مسافر پک اپ کے درمیان خوفناک تصادم میں 11 افراد موقع پر ہی ہلاک ہو گئے۔

حادثے میں 20 سے زائد افراد زخمی ہوگئے۔ جاں بحق ہونے والوں میں 3 خواتین اور 7 بچے شامل ہیں۔ حادثہ اس وقت پیش آیا جب پک اپ میں سوار لوگ مندر میں درشن کرکے واپس آرہے تھے۔

ضلع انتظامیہ نے تصدیق کی:

دوسہ کے ضلع کلکٹر دیویندر کمار نے واقعے کی تصدیق کرتے ہوئے کہا کہ ابتدائی اطلاعات کے مطابق باپی کے قریب ایک حادثے میں 11 افراد کی موت ہوئی ہے۔ 9 لوگوں کو علاج کے لیے ریفر کیا گیا ہے اور 3 ضلع اسپتال میں زیر علاج ہیں۔ حادثہ مسافر پک اپ اور ٹریلر ٹرک کے درمیان پیش آیا۔

جائے حادثہ پر راحت اور بچاؤ کا کام:

حادثے کی اطلاع ملتے ہی پولیس اور ضلع انتظامیہ کی ٹیمیں موقع پر پہنچ گئیں اور زخمیوں کو قریبی اسپتالوں میں لے جایا گیا۔ شدید زخمیوں کو جے پور اور دیگر بڑے طبی مراکز میں ریفر کر دیا گیا ہے۔

انتظامیہ نے جاں بحق افراد کے لواحقین سے رابطہ کیا ہے اور انہیں مالی امداد اور ضروری مدد کی یقین دہانی کرائی ہے۔ عینی شاہدین کے مطابق تصادم اتنا زوردار تھا کہ پک اپ کا اگلا حصہ مکمل طور پر تباہ ہوگیا۔ کئی مسافر گاڑی میں پھنس گئے جنہیں کافی کوشش کے بعد باہر نکالا گیا۔ حادثے کے بعد سڑک پر طویل جام لگ گیا جسے پولیس نے کافی کوشش کے بعد صاف کیا۔