سونمرگ، گلبرگ اور کپواڑا میں برفباری کا سلسلہ جاری، سرینگر لیہہ شاہراہ بند

گاندربل، جموں وکشمیر (فردوس احمد تانترے): وادیٔ کشمیر کو لداخ یو ٹی سے ملانے والی 434 کلومیٹر طویل سری نگر لیہہ قومی شاہراہ تازہ برفباری کی وجہ سے آج بند ہے۔

تفصیلات کے مطابق گاندربل کے سونہ مرگ، زوجیلا اور گگن گیر میں تیز برفباری کا سلسلہ جاری ہے، جس کی وجہ سے سونہ مرگ سڑک پر پھسلن پیدا ہونے سے چھوٹی گاڑیوں کی آمد و رفت بھی متاثر ہوئی ہے۔

سرکاری ذرائع نے بتایا کہ شاہراہ پر کل رات سے ہی برف باری کا سلسلہ جاری ہے اور سڑک پر پھسلن کی وجہ سے خاص طور پر زوجیلا کے پاس، شیطانی نالہ پر گاڑیوں کی آمد ورفت معطل کردی گئی ہے۔

شاہراہ پر ٹریفک روک دیا گیا، متعدد گاڑیاں درماندہ

ذرائع کا کہنا تھا کہ متعدد گاڑیاں، جو اپنی اپنی منزلوں پر روانہ تھیں، شاہراہ کے دونوں اطراف میں درماندہ (پھنسی ہوئی) ہیں۔ ٹریفک پولیس کے ذرائع نے بتایا کہ منی مرگ کی طرف سے زوجیلا پاس پر برف صاف کرنے کا کام شروع کیا جائے گا اگر موسم ٹھیک ہوا۔ ان کا مزید کہنا تھا کہ آج شاہراہ پر ٹریفک آمد ورفت تقریباً نا ممکن ہے۔

اکتوبر 2025 کے پہلے ہفتہ میں ریکارڈ کی گئی تھی برفباری

واضح رہے کہ اس سے قبل وادیٔ گریز کی اونچی چوٹیوں پر 3 اور 4 اکتوبر 2025 کی درمیان شب جمعہ کی رات ہلکی برف بھاری دیکھنے کو ملی تھی۔ یوں اس سال اکتوبر کے آغاز میں ہی یہاں موسم سرما نے دستک دے دی تھی۔

عمومی طور پر وادئ گریز کی اونچی چوٹیوں پر یہ نظارہ اکتوبر کے اواخر یا پھر نومبر کے بعد کبھی بھی دیکھنے کو ملتا تھا۔ گریز کی وادئ تلیل کے کلشے علاقے کے ساتھ ساتھ چند دیگر اونچی چوٹیوں پر ہلکی برف بھاری ہوئی تھی۔

جب کہ وادیٔ گریز کے میدانی علاقوں میں وقفے وقفے سے بارشوں کا سلسلہ بھی جاری تھا۔