پٹرولیم مصنوعات میں ایتھنول کی آمیزش سے گاڑیوں کو کوئی نقصان نہیں ہوگا: گڈکری

 نئی دہلی : لوک سبھا میں جمعرات کو بتایا گیا کہ پٹرول میں ایتھنول ملانے سے گاڑیوں کو کوئی نقصان نہیں ہوتا ہے۔ سڑک ٹرانسپورٹ اور شاہراہوں کے مرکزی وزیر نتن گڈکری نے وقفہ سوال کے دوران بتایا کہ پیٹرولیم مصنوعات میں ایتھنول ملانے سے گاڑیوں کو کوئی نقصان ہوتا ہے یا نہیں، اس کی جانچ کی گئی، جس سے واضح ہوا کہ اس سے گاڑیوں کو کوئی نقصان نہیں ہوتا ہے۔

ایک سوال کے جواب میں مسٹر گڈکری نے کہا کہ کسانوں کو ای20 ایندھن کے استعمال سے کافی منافع مل رہا ہے۔ اس نظام سے ملک کے کسان توانائی فراہم کرنے والے بھی بن گئے ہیں۔

مرکزی وزیر پٹرولیم ہردیپ سنگھ پوری نے ایک سوال کے جواب میں کہا کہ ای20 ایندھن کی وجہ سے خام تیل کی درآمد میں کمی واقع ہوئی ہے۔ اس نظام سے غیر ملکی زر مبادلہ کی بچت بھی ہوئی ہے۔

انہوں نے بتایا کہ اس وقت بین الاقوامی مارکیٹ میں خام تیل کی قیمت فی بیرل 60-65 ڈالر ہے لیکن ریفائننگ، انشورنس اور دیگر عوامل سے صارفین تک پہنچتے پہنچتے پیٹرولیم مصنوعات کی قیمتوں میں اضافہ ہوجاتا ہے۔

انہوں نے کہا کہ ای فیول سسٹم میں پیٹرول میں 20 فیصد ایتھنول ملانے کا منصوبہ ہے اور فی الحال 19.2 سے 19.4 فیصد تک ایتھنول ملایا جا رہا ہے۔ 20 فیصد ایتھنول ملاوٹ کا ہدف بہت جلد شروع ہو جائے گا۔

انہوں نے مزید کہا کہ ایتھنول کی پیداوار ملک کے کسانوں کو نمایاں معاوضہ فراہم کر رہی ہے۔ ملک میں اضافی ایتھنول کی پیداوار کو دیکھتے ہوئے اس کی برآمد بھی شروع کردی گئی ہے۔