یوٹیوبر نے کوکا کولا کی 140 سال پرانی خفیہ ترکیب بے نقاب کر دی

دنیا کے مشہور ترین سافٹ ڈرنکس میں شامل کوکا کولا ہمیشہ سے ذائقے اور رازوں کی وجہ سے لوگوں کی دلچسپی کا مرکز رہی ہے۔ گرمی کے موسم ہوں یا خوشیوں کے موقع، لوگ اس مشروب کو تازگی اور لطف کے لیے پیتے ہیں، مگر اس کی مقبولیت صرف ذائقے تک محدود نہیں بلکہ اس کے منفرد انداز اور پہچان کی وجہ سے بھی ہے۔

سب سے دلچسپ پہلو یہ ہے کہ کوکا کولا کا نسخہ تقریباً 140 برس سے خفیہ رکھا گیا ہے۔ یہ خفیہ ترکیب ہی اسے عام سافٹ ڈرنکس سے ممتاز کرتی ہے اور دنیا بھر میں ایک الگ مقام عطا کرتی ہے۔

کمپنی کی سرکاری ویب سائٹ کے مطابق ہر روز تقریباً 2.2 ارب گلاس کوکا کولا دنیا کے 200 سے زائد ممالک میں پیا جاتا ہے اور اس عالمی کامیابی کے پیچھے وہ فارمولا کارفرما ہے جسے سخت رازداری میں رکھا گیا ہے۔

کوکا کولا کے اجزا کی فہرست میں چینی، کیفین، سوڈیم اور قدرتی ذائقے شامل ہیں، مگر اصل راز وہ قدرتی ذائقے ہیں جو مشروب کو ممتاز بناتے ہیں۔ صدیوں سے لوگوں نے اس ذائقے کو نقل کرنے کی کوششیں کیں، اور اب یوٹیوب چینل Lab Coats کے بانی نے دعویٰ کیا ہے کہ وہ اس راز کے کافی قریب پہنچ گئے ہیں۔

یوٹیوبر کے مطابق انہوں نے تقریباً ایک سال تک تحقیق کی، مختلف اجزا پر تجربات کیے اور بار بار آزمائش کے بعد ایسا مشروب تیار کیا جو ذائقے میں کوکا کولا سے بہت قریب ہے۔ ان کے تیار کردہ مشروب کا نام انہوں نے Lab-Cola رکھا اور اسے دوستوں سمیت مختلف لوگوں کو پیش کیا، جن کی رائے یہ تھی کہ اسے اصل کوکا کولا سمجھا جا سکتا ہے۔

تاریخی حوالے سے دیکھا جائے تو کوکا کولا کو 1886 میں ڈاکٹر جان ایس پیمبرٹن نے ایجاد کیا، جس کا نسخہ ابتدائی طور پر زبانی طور پر چند لوگوں کو بتایا گیا۔ بعد ازاں 1892 میں آسا کینڈلر نے کاروبار کے حقوق حاصل کیے۔ 1919 میں ارنسٹ وُڈرف اور ان کے ساتھیوں نے کمپنی خریدی اور نسخہ نیویارک کے ایک بینک کے لاکر میں محفوظ کروایا۔ بعد میں یہ نسخہ اٹلانٹا منتقل ہوا اور کئی دہائیوں تک سخت نگرانی میں رکھا گیا۔ اسی وجہ سے کمپنی نے کبھی اس فارمولے کا پیٹنٹ نہیں کروایا، کیونکہ اس سے راز فاش ہو سکتا تھا۔

Lab Coats کے بانی نے حال ہی میں ایک ویڈیو جاری کی جس کا عنوان تھا “Perfectly Replicating Coca-Cola (At Tuck Me A’Er)”، جسے چند دنوں میں لاکھوں افراد نے دیکھا۔ انہوں نے بتایا کہ ایک لیٹر کوکا کولا میں تقریباً 110 گرام چینی، 96 ملی گرام کیفین، فاسفورک ایسڈ اور رنگ شامل ہوتے ہیں، مگر اصل چیلنج قدرتی ذائقوں کو سمجھنے میں تھا۔

تجربات کے دوران انہوں نے دارچینی، نارنجی، لونگ اور کالی مرچ جیسے مختلف تیلوں پر کام کیا اور پرانے نسخوں، بشمول پیمبرٹن کے ابتدائی فارمولا، کا جائزہ لیا۔ ان کے مطابق چائے اور دیگر مشروبات میں موجود ٹیننز نے ذائقے میں ہلکا سا کھنچاؤ پیدا کیا، جو کوکا کولا کی پہچان بناتا ہے۔

یہ دعویٰ سوشل میڈیا پر بحث کا موضوع بن چکا ہے۔ اگرچہ کوکا کولا کمپنی کی جانب سے اس پر کوئی ردعمل سامنے نہیں آیا، لیکن سوال یہ پیدا ہوتا ہے کہ کیا سائنس اور مسلسل تجربات کے ذریعے واقعی ڈیڑھ صدی پرانا راز سمجھا جا سکتا ہے؟

یہ کوشش ایک بار پھر اس بات کی یاد دہانی کراتی ہے کہ انسان کی تجسس اور جستجو کبھی ختم نہیں ہوتی، اور تخلیقی سوچ کے ذریعے ناممکن کو ممکن بنانے کی خواہش ہمیشہ زندہ رہتی ہے۔