امریکہ کے شہر منی ایپولس میں مظاہرے جاری، 12 افراد گرفتار

 لاس اینجلس : امریکی ریاست منی سوٹا کے سب سے بڑے شہر منی ایپولس میں امیگریشن اینڈ کسٹمز انفورسمنٹ کی کارروائیوں کے خلاف جاری مظاہروں کے دوران جمعرات کی شب 12 افراد کو گرفتار کیا گیا۔ حکام نے جمعہ کو اس کی تصدیق کی۔

امریکی محکمۂ داخلہ سلامتی  نے سوشل میڈیا پلیٹ فارم ایکس  پر بتایا کہ “قانون نافذ کرنے والے اہلکاروں پر حملے کے الزام میں 12 اینٹی آئی سی ای مظاہرین کو گرفتار کیا گیا ہے۔

مقامی میڈیا کے مطابق مظاہرے جمعہ کو بھی جاری رہے اور مظاہرین کی بڑی تعداد بشپ ہنری وِپل فیڈرل بلڈنگ کے باہر جمع تھی۔

ادھر امریکی صدر ڈونالڈ ٹرمپ نے جمعہ کے روز اپنے سوشل میڈیا پلیٹ فارم ٹروتھ سوشل پر منی سوٹا کی ڈیموکریٹ قیادت پر تنقید جاری رکھی۔

یہ مظاہرے ریاست میں وفاقی آئی سی ای ایجنٹس سے متعلق متعدد واقعات کے بعد شروع ہوئے۔
7 جنوری کو ایک آئی سی ای ایجنٹ نے رینی گڈ نامی 37 سالہ خاتون کو ہلاک کر دیا تھا، جس کے بعد ملک بھر میں احتجاج شروع ہو گیا۔

ڈی ایچ ایس نے تصدیق کی ہے کہ گزشتہ پانچ ہفتوں کے دوران منی سوٹا میں 2,500 سے زائد گرفتاریاں عمل میں آئی ہیں، جبکہ حالیہ ہفتوں میں تقریباً 3,000 وفاقی اہلکار ریاست میں تعینات کیے جا چکے ہیں۔