ریسلنگ: دہلی دنگل واریئرز نے مہاراشٹر کیسری کو شکست دے کر برتری حاصل کی

 نوئیڈا : اتر پردیش کے نوئیڈا سیکٹر 21 اے میں واقع نوئیڈا انڈور اسٹیڈیم میں جاری 16 روزہ پرو ریسلنگ لیگ 2026 کے دوسرے دن جمعہ کی رات دیر تک کھیلے گئے دنگل مقابلے میں دہلی دنگل واریئرز نے اپنے پہلے میچ میں مہاراشٹر کیسری کو 6-3 سے شکست دے کر مضبوط شروعات کی۔

نوئیڈا انڈور اسٹیڈیم میں کھیلے گئے اس مقابلے میں دہلی کی 17 سالہ پہلوان ساریکا نے دن کا سب سے بڑا اپ سیٹ کرتے ہوئے پیرس 2024 کی چاندی کا تمغہ جیتنے والی گُزمان لوپیز یوسنیلس کو 7-0 سے مات دی۔

مقابلے کا آغاز مہاراشٹر کیسری نے خواتین کے 57 کلوگرام زمرے میں منیشا بھنوالا کی 6-0 کی فتح سے برتری حاصل کر کے کیا۔ تاہم دہلی نے مردوں کے 57 کلوگرام زمرے میں شبھم کوشک کی شاندار واپسی کے ذریعے اسکور برابر کر دیا۔ شبھم نے پاور منٹ میں فیصلہ کن چار پوائنٹس کا ٹیک ڈاؤن لگاتے ہوئے 12-10 سے کامیابی حاصل کی۔

خواتین کے 53 کلوگرام زمرے میں نوجوان ساریکا کی برتری کے بعد مہاراشٹر کی دودووا بلیانا ژِوکوا نے انجلی کو 10-2 سے شکست دے کر مقابلہ 2-2 سے برابر کر دیا۔ اس کے بعد 125 کلوگرام ہیوی ویٹ میں مہاراشٹر کے سابق یورپی چیمپئن رابرٹ بارن نے رونک کو 5-0 سے ہرا کر اپنی ٹیم کو ایک بار پھر برتری دلائی۔

اس کے بعد دہلی دنگل واریئرز نے لگاتار شاندار کارکردگی کا مظاہرہ کیا۔ 74 کلوگرام زمرے میں توران بیراموف نے یش کو 14-10 سے شکست دی، جبکہ خواتین کے 76 کلوگرام زمرے میں انستاسیا الپائیوا نے ہرشیتا مور کو فال کے ذریعے ہرا کر دہلی کی برتری کو مزید مضبوط کیا۔ مردوں کے 86 کلوگرام زمرے میں وفائے پور ہادی بختیار کی 5-3 کی جیت نے دہلی کی فتح تقریباً یقینی بنا دی۔ آخر میں کپتان سجیت کلکل نے 6-2 کی متوازن جیت کے ساتھ دہلی کو 6-3 کی شاندار ٹیم فتح دلا دی۔

دہلی کی انستاسیا الپائیوا کو ‘پلیئر آف دی میچ’ جبکہ مہاراشٹر کیسری کے رابرٹ بارن کو ‘فائٹر آف دی میچ’ قرار دیا گیا۔

قابلِ ذکر ہے کہ پرو ریسلنگ لیگ 2026 کا انعقاد 15 جنوری سے یکم فروری تک نوئیڈا انڈور اسٹیڈیم میں کیا جا رہا ہے۔ تمام مقابلوں کی براہِ راست نشریات سونی اسپورٹس ٹین 4 اور ٹین 5 پر کی جا رہی ہیں، جبکہ لائیو اسٹریمنگ سونی لیو پر دستیاب ہے۔
یو این آئی۔ ایم جے۔