خلائی مخلوق کی زندگی کا قوی امکان، زمین پر آنے کا ثبوت نہیں، ناسا سائنسدان کا دعویٰ

امریکی خلائی ادارے ناسا کے ایک سینئر سائنسدان نے خلائی مخلوق سے متعلق جاری عالمی بحث میں اہم وضاحت کرتے ہوئے کہا ہے کہ کائنات کی وسعت کو دیکھتے ہوئے زمین سے باہر زندگی کے امکانات کو رد نہیں کیا جا سکتا، تاہم اب تک ایسا کوئی ناقابلِ تردید ثبوت دستیاب نہیں جو یہ ثابت کرے کہ کسی غیر زمینی مخلوق نے ہماری دنیا کا رخ کیا ہو۔

بین الاقوامی خبر رساں اداروں کے مطابق اس بیان نے سوشل میڈیا اور سائنسی حلقوں میں نئی بحث چھیڑ دی ہے۔

1968 سے ناسا سے وابستہ سائنسدان جینٹری لی نے ایک تقریب سے خطاب کرتے ہوئے واضح کیا کہ اب تک کی تمام سائنسی تحقیقات، مشاہدات اور خلائی مشنز میں کوئی ایسی شہادت سامنے نہیں آئی جس سے یہ نتیجہ اخذ کیا جا سکے کہ کسی خلائی مخلوق یا اس کی ٹیکنالوجی نے زمین پر قدم رکھا ہے۔

انہوں نے کہا کہ عوامی سطح پر پھیلنے والی بیشتر کہانیاں قیاس آرائیوں، غلط فہمیوں یا غیر مصدقہ اطلاعات پر مبنی ہوتی ہیں۔

انہوں نے اس بات پر زور دیا کہ ہماری کہکشاں سمیت اربوں کہکشاؤں پر مشتمل کائنات اس قدر وسیع ہے کہ وہاں زندگی کا امکان مکمل طور پر خارج نہیں کیا جا سکتا۔

جینٹری لی نے بتایا کہ سائنسدانوں کی توجہ خاص طور پر ایسے سیاروں پر مرکوز ہے جو زمین جیسے ماحول کے حامل ہوں۔ اسی تناظر میں ماہرین TRAPPIST-1e جیسے سیاروں کا تفصیلی مطالعہ کر رہے ہیں، جو زمین سے تقریباً 40 نوری سال کے فاصلے پر واقع ہے اور ممکنہ طور پر قابلِ رہائش ماحول رکھتا ہے۔

یہ معاملہ اس وقت مزید زیر بحث آیا جب سابق امریکی صدر بارک اوباما کی ایک پرانی گفتگو دوبارہ منظر عام پر آئی، جس میں انہوں نے خلائی رازوں کا ذکر کیا تھا، تاہم بعد میں انہوں نے واضح کیا کہ اپنے دور صدارت میں انہیں کسی غیر زمینی مخلوق کی موجودگی کا کوئی مصدقہ ثبوت نہیں ملا۔

دوسری جانب موجودہ امریکی صدر ڈونلڈ ٹرمپ نے متعلقہ اداروں کو ہدایت دی ہے کہ یو ایف اوز سے متعلق سرکاری ریکارڈ کی مزید تفصیلات عوام کے سامنے لانے کے لیے اقدامات کیے جائیں، جس سے اس موضوع پر دلچسپی میں اضافہ ہوا ہے۔

ماہرین فلکیات کا کہنا ہے کہ خلائی حیات کی تلاش ایک طویل اور پیچیدہ عمل ہے جس میں جدید دوربینوں، خلائی مشنز اور ریڈیو سگنلز کے ذریعے کائناتی پیغامات کی تلاش شامل ہے۔

سائنس ابھی تک کسی حتمی نتیجے پر نہیں پہنچی، لیکن تحقیق کا سلسلہ جاری ہے۔

سائنسدانوں کے مطابق آنے والے برسوں میں ٹیکنالوجی کی ترقی انسان کو اس سوال کا واضح جواب دینے کے قابل بنا سکتی ہے کہ کیا ہم اس کائنات میں تنہا ہیں یا نہیں۔ فی الحال سائنسی مؤقف یہی ہے کہ امکانات موجود ہیں، مگر ثبوت کا انتظار ہے۔