انٹارکٹیکا کی پراسرار “بلڈ فالز” کا راز سامنے آگیا

انٹارکٹیکا کے مشرقی حصے میں واقع ٹیلر گلیشیئر سے نکلنے والی سرخ رنگت والی آبشار، جسے “بلڈ فالز” کہا جاتا ہے، طویل عرصے سے سائنسدانوں کے لیے معمہ بنی ہوئی تھی۔ اب نئی تحقیق میں اس منفرد قدرتی مظہر کی اصل وجہ سامنے آ گئی ہے۔

ماہرین کے مطابق یہ آبشار زمین کی سرد ترین اور خشک ترین جگہوں میں سے ایک علاقے میں واقع ہے۔ برفانی ماحول کے درمیان اچانک سرخ رنگ کا پانی بہنا طویل عرصے تک ماہرین کو حیران کرتا رہا۔

تحقیقاتی ٹیم کی سربراہی کرنے والی محقق ایرِن سی پِٹ اور ان کے ساتھیوں نے دریافت کیا کہ اس سرخ رنگ کی وجہ کسی جاندار یا حیاتیاتی مواد کی موجودگی نہیں بلکہ برف کے نیچے موجود انتہائی نمکین اور لوہے سے بھرپور پانی ہے۔

ماہرین کے مطابق جب یہ لوہے سے بھرا پانی برف کے اندر سے نکل کر سطح پر آتا ہے اور آکسیجن کے ساتھ ملتا ہے تو کیمیائی عمل کے نتیجے میں آئرن آکسائڈ بن جاتا ہے۔ یہی آئرن آکسائڈ پانی کو زنگ زدہ سرخ رنگ دیتا ہے، جس کی وجہ سے یہ آبشار خون جیسی دکھائی دیتی ہے اور اسے “بلڈ فالز” کا نام دیا گیا۔

تحقیق کے دوران یہ بھی معلوم ہوا کہ جیسے جیسے پانی آبشار کے دہانے کے قریب پہنچتا ہے، اس میں لوہے کی مقدار بڑھتی جاتی ہے۔ اس سے یہ اندازہ ہوا کہ پانی کے درجہ حرارت اور نمک کی مقدار کے درمیان گہرا تعلق موجود ہے، جو اس پورے نظام کو متحرک رکھتا ہے۔

ٹیلر گلیشیئر کو دنیا کے سرد ترین گلیشیئرز میں شمار کیا جاتا ہے، مگر حیرت انگیز طور پر اس کے اندر موجود نمکین پانی مکمل طور پر منجمد نہیں ہوتا اور مسلسل بہاؤ میں رہتا ہے، برف، نمک، لوہا اور حرارت کا یہ پیچیدہ امتزاج ایک ایسا منفرد نظام بناتا ہے جو بظاہر مردہ دکھائی دینے والے برفانی صحرا میں بھی حرکت اور کیمیائی سرگرمی کو جاری رکھتا ہے۔

سائنسدانوں کے مطابق یہ دریافت نہ صرف زمین کے برفانی علاقوں کو سمجھنے میں مدد دے گی بلکہ ممکن ہے کہ دیگر سیاروں پر زندگی کی تلاش میں بھی رہنمائی فراہم کرے۔