100ویں سالگرہ پر سابق امریکی فوجی کی خواہش نے لوگوں کے دل جیت لیے

امریکی ریاست ٹیکساس میں دوسری جنگ عظیم کے سابق فوجی نے اپنی 100 ویں سالگرہ پر 100 تہنیتی کارڈز ملنے کی خواہش ظاہر کی، لیکن لوگوں نے محبت اور قدر دانی کا ایسا اظہار کیا کہ انہیں ملک بھر سے 4 ہزار سے زائد کارڈز موصول ہوگئے۔

غیر ملکی خبر رساں ویب سائٹ کی رپورٹ کے مطابق وِلڈن کینتھ بووِن کے لیے ٹیکساس ویٹرنز لینڈ بورڈ نے اپنے خصوصی منصوبے ’’100 فار 100‘‘ کے تحت عوام سے اپیل کی تھی کہ وہ سابق میرین فوجی کی صدیوں پر محیط زندگی کے اس اہم موقع پر انہیں سالگرہ کے کارڈز بھیجیں۔

بین الاقوامی ذرائع ابلاغ کی رپورٹس کے مطابق یہ پیغام مقامی اخبارات اور ایک ریڈیو اسٹیشن کے ذریعے لوگوں تک پہنچایا گیا، جس کے بعد سوشل میڈیا پر بھی اس اپیل کو بڑے پیمانے پر شیئر کیا گیا۔ یوں ایک محدود خواہش نے ملک بھر کے لوگوں کو اس سابق فوجی کے لیے نیک تمناؤں کے اظہار پر آمادہ کردیا۔

عالمی میڈیا کی رپورٹس کے مطابق بووِن کی سالگرہ کی تقریب تک ان کے پاس مطلوبہ 100 کارڈز کے بجائے 4 ہزار سے زیادہ کارڈز پہنچ چکے تھے۔ ان میں امریکا کے مختلف علاقوں سے بھیجے گئے پیغامات شامل تھے، جن کے ذریعے لوگوں نے انہیں مبارک باد دینے کے ساتھ ان کی فوجی خدمات پر تشکر کا اظہار بھی کیا۔

میڈیا رپورٹس میں بتایا جارہا ہے کہ وِلڈن کینتھ بووِن 5 ستمبر 1926 کو ٹیکساس کے شہر لولنگ میں پیدا ہوئے تھے۔ انہوں نے 1945 میں امریکی میرینز میں شمولیت اختیار کی اور دوسری جنگ عظیم کے آخری ایام میں فوجی خدمات انجام دیں۔

ان کی فوجی خدمات کے اعتراف میں انہیں 1946 میں گڈ کنڈکٹ میڈل اور ایکسپرٹ رائفل مین بیج سے نوازا گیا، جس کے بعد وہ فوج سے فارغ ہوگئے، اپنی 100 ویں سالگرہ پر صرف 100 کارڈز کی خواہش رکھنے والے بووِن کو ہزاروں پیغامات ملنے سے یہ موقع ان کے لیے یادگار بن گیا۔ لوگوں کی جانب سے محبت اور احترام کے اس غیر معمولی اظہار نے ان کی سالگرہ کو ایک عام تقریب سے بڑھ کر خاص یاد میں تبدیل کردیا۔