دہلی میں آج کوئی بڑا مظاہرہ نہیں، لیکن ٹریفک ایڈوائزری جاری، گھر سے نکلتے وقت رکھیں خیال

چیف الیکشن کمشنر گیانیش کمار کے خلاف دہلی میں گزشتہ کچھ دنوں سے زوردار احتجاجی مظاہرے ہو رہے ہیں۔ اس کی وجہ سے جگہ جگہ سخت سیکورٹی دیکھنے کو مل رہی ہے اور راستے بند ہونے کی وجہ سے لوگوں کو شدید پریشانی کا بھی سامنا کرنا پڑ رہا ہے۔

مستقل کئی دنوں سے بڑے مظاہروں کے بعد آج (13 اکتوبر) اپوزیشن یا نوجوانوں کا کوئی بڑا مظاہرہ مقرر نہیں ہے، پھر بھی دہلی ٹریفک پولیس نے منگل کو امن و قانون کی صورت حال کے پیش نظر ٹریفک ایڈوائزری جاری کی ہے۔

جاری ٹریفک ایڈوائزری کے مطابق آج بھی دہلی کی کئی سڑکوں اور چوراہوں پر ٹریفک متاثر ہونے کا خدشہ ظاہر کیا گیا ہے۔ زمینی صورت حال کے مطابق عارضی طور پر راستوں میں تبدیلی اور پابندیاں نافذ کی جا سکتی ہیں۔

ٹریفک پولیس نے اس سلسلے میں ہدایات جاری کی ہیں۔ پولیس کا کہنا ہے کہ گاڑی چلانے والے افراد متاثرہ علاقوں میں غیر ضروری سفر سے گریز کریں، راستوں میں تبدیلی سے متعلق نشانات اور ٹریفک اہلکاروں کی ہدایات پر عمل کریں اور ٹریفک کی روانی برقرار رکھنے کے لیے دہلی ٹریفک پولیس کے ساتھ تعاون کریں۔

دہلی ٹریفک پولیس نے بتایا کہ پنچکوئیاں گول چکر کے آس پاس ٹریفک متاثر ہو سکتا ہے۔ یہاں جام لگنے یا راستوں میں تبدیلی کا سامنا کرنا پڑ سکتا ہے۔ اس کے علاوہ منڈی ہاؤس گول چکر کے آس پاس آمد و رفت میں بھی دشواری ہو سکتی ہے۔

ڈاکٹر دنیش نندنی ڈالمیا چوک، رام چرن اگروال چوک (اے پوائنٹ)، منٹو روڈ اور دین دیال اپادھیائے مارگ، گرو نانک چوک، چیمسفورڈ روڈ-کناٹ پلیس آؤٹر سرکل ٹی پوائنٹ، بھیرو روڈ-ایم جی ایم (رنگ روڈ) ٹی پوائنٹ، لودھی روڈ فلائی اوور، نیلا گنبد گول چکر اور سردار پٹیل مارگ-پنچ شیل مارگ کراسنگ پر بھی ٹریفک متاثر رہ سکتا ہے۔

اسی طرح بھیکاجی کاما پلیس کے نیچے، موتی باغ فلائی اوور کے نیچے، رنگ روڈ-سین مارٹن مارگ ٹی پوائنٹ، اشوکا روڈ-جنتر منتر روڈ گول چکر، ریل بھون گول چکر، جے سنگھ روڈ-پارلیمنٹ مارگ کراسنگ، کناٹ پلیس آؤٹر سرکل-بارہ کھمبا روڈ ٹی پوائنٹ، پٹیل چوک گول چکر، جے سنگھ روڈ-اشوکا روڈ ٹی پوائنٹ، آر ایم ایل اسپتال گول چکر اور کناٹ پلیس کے آؤٹر سرکل اور پارلیمنٹ مارگ کے جنکشن پر بھی ٹریفک متاثر ہونے کا خدشہ ہے۔

ٹریفک پولیس کا کہنا ہے کہ یہ وہ مقامات ہیں جہاں ٹریفک متاثر ہونے کا امکان ہے، لیکن ضروری نہیں کہ ہر جگہ ٹریفک بند کیا جائے۔ امن و قانون کی صورت حال کے مطابق راستوں میں تبدیلی کے انتظامات بدل سکتے ہیں۔

ایسی صورت میں اگر ٹریفک کی آمد و رفت متاثر ہوتی ہے تو گاڑیوں کو متبادل راستوں سے بھی روانہ کیا جا سکتا ہے۔ دہلی پولیس نے ٹریفک سے متعلق تازہ معلومات حاصل کرنے کے لیے لوگوں کے ساتھ سوشل میڈیا پلیٹ فارم کے لنکس اور واٹس ایپ نمبر بھی شیئر کیے ہیں، جن کے ذریعہ مسافر ٹریفک کی تازہ صورت حال سے آگاہ ہو سکتے ہیں۔