کیا کنگ چارلس شہزادہ ہیری کو دوبارہ شاہی رکن قرار دے سکتے ہیں؟

ڈچز آف سسیکس، برطانوی شاہی خاندان سے منحرف شہزادہ ہیری اور ان کی اہلیہ امریکی اداکارہ میگھن مارکل کی برسلز میں یورپی پارلیمنٹ میں حالیہ شرکت کے بعد شہزادے کی شاہی خاندان میں ممکنہ واپسی اور والد شاہ چارلس سے تعلقات کی بحالی سے متعلق نئی بحث شروع ہو گئی۔

دی نیوز انٹرنیشنل نے برطانوی شاہی خاندان کے قریبی ذرائع کے حوالے سے اپنی ایک رپورٹ میں بتایا ہے کہ شہزادہ ہیری میں عوام سے رابطہ قائم کرنے کی ایسی صلاحیت موجود ہے جس کا متبادل آسانی سے نہیں مل سکتا۔

شاہی ذرائع کا کہنا ہے کہ شہزادہ ہیری شاہی خاندان سے علیحدگی کے باوجود دنیا بھر میں پہچان اور اہم سماجی و فلاحی معاملات پر عالمی توجہ حاصل کرنے کی صلاحیت رکھتے ہیں۔

ذرائع کے مطابق شاہی خاندان کے لیے یہ غور طلب معاملہ ہے کہ جب شاہی ذمے داریاں نبھانے والے افراد کی تعداد محدود ہے تو ہیری کی صلاحیتوں سے فائدہ کیوں نہ اٹھایا جائے؟ ہیری کی واپسی مشکل ضرور ہے تاہم انہیں محدود اور واضح ذمے داریوں کے تحت دوبارہ شاہی فرائض سونپنے کے امکانات کو نظر انداز نہیں کیا جا سکتا۔

رپورٹ کے مطابق اس معاملے میں سب سے بڑی رکاوٹ شاہ چارلس اور ہیری کے درمیان اعتماد کی بحالی ہو گی، دونوں جانب ماضی کے اختلافات اور تلخیاں موجود ہیں، اس لیے شاہ چارلس کو بطور والد اپنے جذبات اور بطور بادشاہ اپنی ذمے داریوں میں توازن قائم کرنا ہو گا۔

شاہی ذرائع کا کہنا ہے کہ ہیری کی شاہی حیثیت شہزادے کی عوامی شناخت کا اہم حصہ ہے تاہم شاہی ذمے داریوں سے دستبرداری کے بعد وہ ایسی صورتِ حال میں ہیں جہاں شہزادے کو شاہی خاندان کی پہچان تو حاصل ہے لیکن سرکاری ذمے داریاں حاصل نہیں۔

رپورٹ میں یہ بھی کہا گیا ہے کہ ہیری کی ممکنہ واپسی کی صورت میں میگھن مارکل کو اپنے ذاتی اور پیشہ ورانہ منصوبے جاری رکھنے کی آزادی حاصل رہ سکتی ہے جبکہ ہیری محدود شاہی ذمے داریاں ادا کر سکتے ہیں۔

ذرائع کے مطابق سابق فوجیوں کی فلاح و بہبود اور خیراتی سرگرمیوں سے متعلق ذمے داریاں ہیری کی واپسی کی راہ ہموار کر سکتی ہیں تاہم اس سے پہلے خاندان کے اندر ذاتی تعلقات اور اعتماد کی بحالی ضروری ہو گی۔

واضح رہے کہ شہزادہ ہیری اپنی اہلیہ میگھن مارکل کے ساتھ شاہی فرائض سے دستبردار ہو گئے تھے اور بطور شاہی رکن منحرف ہو گئے تھے، یہ جوڑا بعد ازاں کیلیفورنیا منتقل ہو گیا تھا۔

شہزادہ ہیری کی سوانح عمری ’اسپیئر‘ میں شاہی خاندان سے متعلق انکشافات نے بھی اختلافات میں اضافہ کیا۔