سڑک حادثہ میں کسان کی موت، دوافراد زخمی

لکھنؤ۔: بخشی کا تالاب علاقہ میں موٹر سائیکل سوار تین افراد کو ایک ٹرک نے ٹکر مار دی۔ ٹکر لگنے کے سبب تینوں گر گئے جس میں ایک شخص کی اسپتال میں علاج کے دوران موت ہو گئی ۔حادثہ میں زخمی دیگر دو لوگوں کو ٹراما سینٹر میں داخل کرایا گیا ہے۔ مڑیاؤں کا رہنے والا کسان رام شنکر (۳۵) اپنے دوست وجے کے ساتھ اس کے دوست چھوٹے کو موٹر سائیکل سے چھوڑنے کیلئے پرتھوی پور بی کے ٹی جا رہا تھا،تینوں ایک ہی موٹر سائیکل پر سوار تھے۔ موصولہ اطلاع کے مطابق جب تینوں سیتاپور روڈ واقع سریاں گھاٹ کے پاس پہنچے اسی دوران مخالف سمت سے آرہے ٹرک نے ان کی موٹر سائیکل میں ٹکر مار دی۔
جس سے تینوں موٹر سائیکل سوار گر گئے۔ حادثہ ہوتے دیکھ کر مقامی لوگوں نے انہیں راہ گیروں کی مدد سے ٹراما سینٹر میں داخل کرایا جہاں علاج کے دوران رام شنکر نے دم توڑ دیا جبکہ وجے اور چھوٹے کی حالت خطرہ سے باہر بتائی جا رہی ہے۔ اس بات کی اطلاع رام شنکر کے بھائی وجے شنکر نے دی ہے۔