ایک لڑکی نے لگائی آگ ، ایک نے کی خودکشی کی کوشش

لکھنؤ۔(نامہ نگار)موہن لال گنج علاقے میں ایک لڑکی نے پیر کو آگ لگالی۔ آگ سے بری طرح جھلسی لڑکی کو علاج کیلئے سول اسپتال میں داخل کرایا گیا جہاں اس کی حالت بے حد تشویشناک بتائی جارہی ہے۔ دوسری طرف غازی پور علاقے میں ایک لڑکی نے پھانسی لگالی۔ کنبے کے افراد نے اسے رام منوہر لوہیا اسپتال میں داخل کرایا ۔ موہن لال گنج کے سیسینڈی گاؤں کی رہنے والی ۲۰سالہ سپنا نے پیر کو مٹی کا تیل چھڑک کر آگ لگالی۔ بری طرح جھلسی سپنا کو علاج کیلئے سی ایچ سی میں داخل کرایا گیا جہاں سے ڈاکٹروں نے اسے سول اسپتال منتقل کردیا۔ سول اسپتال میں داخل سپنا کی حالت نازک بتائی جارہی ہے۔ اس کے علاوہ غازی پوری گاؤ ں کی رہنے والی پوجا نام کی ایک لڑکی نے پیر کی رات گھر میں پھانسی لگالی۔ گھر والوں نے اسے پھندے سے لٹکا ہوا دیکھا تواسے نیچے اتارا اور علاج کیلئے رام منوہر لوہیا اسپتال میں داخل کردیا۔ پوجا کی حالت بھی تشویشناک بتائی جارہی ہے۔
عالم باغ میں پینے کے پانی کا بحران
لکھنو۔عالم باغ میں پینے کے پانی کی سپلائی نہ ہونے کی وجہ سے لوگوں کو کافی دشواریوں کا سامنا کرنا پڑرہا ہے۔ پانی نہ آنے کی وجہ سے لوگ سمر سیبل کا سہارا لے رہے ہیں۔مقامی لوگوں میں سخت ناراضگی دیکھی جارہی ہے۔علاقے میں صبح سے پانی نہیں آرہا تھا۔ جس کی وجہ سے لوگ دور دراز علاقوں سے پانی لا رہے تھے۔