بولی وڈ فلم ‘ہمپٹی شرما کی دلہنیا’ کے پہلے ٹریلر کی ویڈیو نے انٹرنیٹ پر دھوم مچادی جسے 48 گھنٹوں میں دس لاکھ افراد دیکھ چکے ہیں۔کامیڈی فلم ‘ہمپٹی شرما کی دلہنیا’ کی کاسٹ میں چلبلے اداکار ورون دھون اور کیوٹ ہیروئن عالیہ بھٹ شامل ہیں۔
دیگر کاسٹ میں اشوتوش رانا اور ٹیلیوژن اداکار سدھارتھ شکلا بھی اداکاری کے جوہر دکھائیں گے۔
عالیہ کی فلم ‘ٹو اسٹیٹس’ اور ورون کی ‘میں تیرا ہیرو’ نے دھوم مچا کر انہیں راتوں رات شہرت کی بلندیوں پر پہنچایا تھا۔
فلم میں عالیہ بھٹ ایک پنجابی لڑکی کے روپ میں نظر آئیں گی جبکہ ورون دھون اپنے روایتی کردار میں نظر آئیں گے جو ان کی پہلی فلموں سے قدرے مختلف نہیں۔
بولی وڈ فلم ‘ہمپٹی شرما کی دلہنیا’ کی کہانی محبت کرنے والے جوڑے کے گرد گھومتی ہے جس میں ورون عالیہ کو اپنی دلہنیا بنانے کے جتن کرتے نظر آ رہے ہیں۔
دونوں اداکاروں نے ہدایت کار کرن جوہر کی فلم ‘اسٹوڈینٹ آف دا ایئر’ سے ایک ساتھ ڈیبیو کیا تھا اور یہ ان دونوں کی ایک ساتھ دوسری فلم ہے۔
ہمپٹی شرما کی دلہنیا بھی معروف ہدایت کار کرن جوہر نے پروڈیوس کی ہے جو گیارہ جولائی کو سینما گھروں میں پیش کی جائے گی۔
