سنیل شیٹی کی اولادیں بڑے پردے پر جلد

بالی وڈ کے ایکشن ہیرو کے طور پر جانے جانے والے سنیل شیٹی کا ویسے تو فلمی کیریئر اب رک سا گیا ہے لیکن ان کی اولادیں فلموں میں آنے کے لئے پر تول رہی ہیں ۔ سنیل شیٹی کے بیٹے ایان شیٹی اور بیٹی اتھیا شیٹی بڑے پردے پر بہت جلد نظر آنے والے ہیں ۔ اتھیا شیٹی سبھاش گھئی کی فلم ہیرو کے ریمیک سے بالی وڈ میں ڈیبو کرنے والی ہیں وہیں ایان شیٹی کو فلموں میں لانے کے لئے سنیل شیٹی بااثر اور بڑے بجٹ کی فلم کا انتظار کر رہے ہیں ۔ سنیل شیٹی کا کہنا ہے کہ ایان کو اپنی فلم میں لینے کے لئے بالی وڈ کے کئی نامی بینرس نے آفر کیاہے ۔ سنیل شیٹی کا خیال ہے کہ فلم میں آنے کے لئے ایان پوری تیاری کر لیں ۔ حالانکہ سنیل شیٹی کا اپنا پروڈکشن ہاؤس ’پاپ کارن فلمز‘ ہے ۔ اس لئے خیال کیا جاتا ہے کہ وہ اپنے بچوں کو فلموں میں لانے کے لئے اپنے بینر کا سہارا لیں گے لیکن سنیل شیٹی ایسا کرنے نہیں جا رہے ہیں ۔ سنیل شیٹی کا کہنا ہے کہ ہماری اولادیں اور کے بینر تلے بننے والی فلموں سے ہی بالی وڈ میں ڈیبو کریں گی ۔ فی الحال سنیل شیٹی اپنی بیٹی اتھیا شیٹی کو لانچ کرنے میں کافی سرگرم ہیں تاکہ اس کام میں کسی بھی طرح کی کوئی کمی نہ رہنے پائے ۔ سبھاش گھئی کی فلم ہیرو بھی جیکی شراف اور مینا کشی شیشادری کے لئے ڈیبو فلم تھی اور یہ فلم سپر ہٹ رہی تھی ۔ ہیرو کے ریمیک میں ہی اتھیا شیٹی کی انٹری ہو رہی ہے اس لئے یہ دیکھنے والی بات ہوگی کہ کیا ہیرو کے ریمیک کی فلم اتھیا شیٹی کے لئے ویسی
ہی ثابت ہوگی جس طرح ہیرو جیکی شراف اور مینا کشی شیشادری کے لئے کافی مدد گار ثابت ہوئی تھی ۔