مہانگر میں کھڑی کار بن گئی آگ کا گولا

لکھنؤ(نامہ نگار)مہا نگر کلاسک ریسٹورینٹ کے نزدیک کھڑی ایک آئی-۱۰کار میں آج دوپہر اچانک آگ لگ گئی۔ دیکھتے ہی دیکھتے پوری کار آگ کا گولا بن گئی۔ اس سے قبل کہ لوگ آگ پر قابو پاتے کہ کار پوری طرح جل کر خاکستر ہو گئی۔ انسپکٹر مہا نگر ناگیندر چوبے نے اس سلسلہ میں بتایا کہ جانکی پورم آئی آئی ایم روڈ کے رہنے والے امر جیت سنگھ ایک دوا کمپنی میں کام کرتے ہیں آج دوپہر امر جیت اپنی آئی-۱۰؍اسپورٹس کار سے مہا نگر کلاسک ریسٹورینٹ کے نزدیک آئے ہوئے تھے۔ انہوں نے گولڈ جم کے پاس اپنی کار کھڑی کر دی تھی۔ بتایا جاتا ہے کہ کھڑی کار میں اچانک لوگوں نے دھواں اٹھتے دیکھا لوگ کچھ سمجھ پاتے اس سے قبل کار سے تیز آگ کی لپٹیں نکلنا شروع ہو گئیں۔ اچانک لگی آگ کی وجہ سے وہاں افراتفری مچ گئی۔ آس پاس کے لوگوںنے آگ پر قابو پانے کی کوشش کی لیکن اس سے قبل ہی کار پوری طرح جل کر خاک ہو چکی تھی۔ اطلاع ملتے ہی مہا نگر پولیس بھی موقع پر پہنچ گئی۔ پولیس کے مطابق کار میں شارٹ سرکٹ کی وجہ سے آگ لگی۔