ممبئی: بالی ووڈ اداکارہ شروتی ہاسن ہدایتکار تگمانشو دھولیا کی فلم ’’یار‘‘ میں مرکزی کردار میں جلوہ گر ہوں گی فلم ”لک” سے بالی ووڈ میں قدم رکھنے والی اداکارہ سنیر کھیترپال اور کلدیپ راٹھور کی مشترکہ پروڈکشن میں عرفان خان ودیوت جاموال اور امیت سدھ کے ساتھ دہرے کردار میں نظر آئیں گی جب کہ فلم میں ہدایتکار تگمانشو دھولیا اور اداکارہ آسین ٹھوٹمکل بھی اہم رول ادا کر رہے ہیں۔ بھارتی میڈیا کے مطابق ۲۰۱۱ کی مشہور فرانسیسی فلم ’لیس لیوناس‘ کے اس ہندی ریمیک کی عکس بندی نئی دہلی میں شروع ہو گئی ہے جب کہ بھارتی ریاست اترکھنڈ کے علاوہ نیپال اور جارجیا میں بھی فلم کی شوٹنگ کی جائے گی جس کے لیے فلمسازوں نے تمام انتظامات مکمل کرلیے ہیں اور جیسے ہی بھارت میں فلم کی شوٹنگ مکمل ہوگی تمام کاسٹ اور عملہ بیرون ملک روانہ ہوجائے گا۔ اداکارہ شروتی ہاسن کا کہنا ہے کہ میں بالی ووڈ میں اپنے والد کمل ہاسن کی وجہ سے کامیاب نہیں ہو رہی اور نہ ہی مجھے ان کی وجہ سے کام مل رہا ہے بلکہ میں اپنی صلاحیتوں کی بنا پر اپنا مقام بنانے کی جدوجہد کر رہی ہوں۔ اداکارہ کا کہنا تھا کہ تگمانشودھولیا نے میری اداکاری کو دیکھ کر ہی اپنی فلم ”یارا” میں مرکزی کردار کے لیے کاسٹ کیا اس فلم میں ڈبل رول میں کام کر رہی ہوں جو ایک نوجوان لڑکی جب کہ دوسری ایک شادی شدہ خاتون کا ہے۔ ایک سوال کے جواب میں شروتی ہاسن نے کہا کہ تگمانشودھولیا کی ہدایتکاری میں پہلی مرتبہ کسی فلم کام کر رہی ہوں، امید ہے مداحوں کو میری اس فلم میں پرفارمنس پسند آئیگی۔
