بپاشا باسو کی نئی فلم کے ٹریلر سے ناظرین کے رونگٹے کھڑے

ممبئی: بالی ووڈ اداکارہ بپاشا باسو کی نئی ہارر فلم ’’الون ‘‘کے ٹریلر نے شائقین کے ونگٹے کھڑے کر دیے۔جس میں اداکارہ دھڑ جڑی بہنوں کے کردار میں جلوہ گر ہوئی ہیں۔ بھوشن پاٹیل کی ہدایتکاری میں بننے والی فلم کی کہانی دھڑ جڑی دو بہنوں کی ہے جو ہمیشہ ساتھ رہنے کا وعدہ کرتی ہیں لیکن ایک کی موت کے بعد انھیں الگ ہونا پڑ جاتا ہے۔ ساتھ رہنے کا وعدہ توڑنے پر مرنیوالی بہن کا بھوت واپس آکر دوسری کی زندگی اجیرن کر دیتا ہے۔ ہارر فلم میںِ بپاشا باسو اور کرن سنگھ گروور مرکزی کردار میں جلوہ گر ہیں۔
اس فلم سے متعلق بپاشا باسو نے کہا ہے کہ فلم ’’ الون‘‘ میں انھوں نے بولڈ ترین کردار نبھایا ہے بالی ووڈ اداکارہ بپاشا باسو نے اپنے حالیہ انٹرویو میں کہا کہ وہ فلم ’’ راز‘‘ اور ’’ راز تھری ڈی ‘‘ میں اہم کردار نبھا چکی ہیں لیکن ان کی نئی فلم ’’ الون ‘‘ میں ان کا بولڈ ترین کردار ہوگا۔یہ محبت بھری کہانی ہے جس میں خوف کا عنصر بھی موجود ہے‘ یہ لو اسٹوری مرد ، عورت اور ایک جن کے گرد گھومتی ہے جو مداحوں کے لیے نیا موضوع ہوگی۔ فلم میں ان کے ہیرو کرن سنگھ گروور ہونگے۔ اداکارہ نے کہا کہ ان پر ہارر فلموں میں مخصوص کردار کی چھاپ ہے وہ اس چھاپ کو بدلنا نہیں چاہتیں‘ یہ ان کی پہچان ہے جس سے انھیں خوشی حاصل ہوتی ہے۔ فلم ’’ الون‘‘ آئندہ سال 16جنوری کو سینما گھروں میں نمائش کے لیے پیش کی جائے گی۔دوسری طرف پریانکا چوپڑا نے بھی بپاشا باسو کی اس نئی ہارر فلم کی تعریف کرتے ہوئے اپنے ایک ٹویٹ میں لکھا ہے کہ وہ بپاشا باسو کی فین ہیں اور ان کی نئی فلم ’’الون ‘‘ کو ضرور دیکھیں گی۔ اس سے پہلے کئی بالی ووڈ اداکاروں نے سوشل میڈیا پر فلم کے ٹریلر پر بپاشا باسو کی اداکاری کی تعریف کی ہے جن میں اداکار ہریتک روشن‘ نیل نتن مکیش اور فلمساز کرن جوہر شامل ہیں۔