لکھنؤ۔(نامہ نگار)غازی پور کے منشی پلیا علاقے میں رہنے والی ایک بیوہ خاتون کا اسی کے گھر میں قتل کردیا گیا۔خاتون کی نیم برہنہ لاش اس کے کمرے میں فرش پرپڑی ملی۔خاتون کے سر اور گلے پر چوٹ کے نشان تھے۔ سی او غازی پور دنیش پوری نے بتایا کہ ہردوئی کی رہنے والی۳۵سالہ نیہا (تبدیل شدہ نام)منشی پلیا واقع جے چندر کے مکان نمبر ۱۰۴۹؍۱۱میں کرائے پر رہتی تھی۔ نیہا کے شوہر کی دوبرس قبل سڑک حادثے میں موت ہوگئی تھی۔شوہر کے موت کے بعد وہ تنہا ہی کرائے کے مکان میں رہ رہی تھی۔ دوشنبہ کی صبح پڑوس میں رہنے والے ایک شخص نے نیہا کے گھر کا دروازہ کھلا دیکھا۔ پڑوسی نے اس بات کی اطلاع مکان مالک کینٹ کے رہنے والے جے چندر کو دی۔خبر پاکر مکان مالک اپنے بیٹے کے ساتھ وہاں پہنچ گیا۔
مکان مالک جے چندر نے اندر جاکر دیکھا تو حیران رہ گیا۔نیہا کی خون سے لت پت نیم برہنہ لاش کمرے کے فرش پر بچھے گدے پر پڑی تھی۔مکان مالک نے فوراً اس بات کی اطلاع پولیس کنٹرول روم کو دی۔خاتون کے قتل کی خبر پاکر موقع پر ایس او غازی پور دویندر دوبے اور سی او غازی پور دنیش پوری بھی پہنچ گئے۔پولیس نے تفتیش کے لئے موقع پر انگلیوں کے نشان اور ڈاگ اسکوائڈکو بھی بلالیا۔ نیہا کے سر اور گلے پر چوٹ کے نشان تھے۔تفتیش کے بعد پولیس نے نیہا کے لاش کو پوسٹ مارٹم کے لئے بھیج دیا۔اور قتل کی خبر اس کے کنبہ والوں کو بھی دے دی ہے۔
نیہا کا قتل کس نے اور کیوں کیا۔فی الحال اس بات کا پتہ نہیں چل سکا ہے۔پولیس قتل کے پیچھے لوٹ مار اور آپسی رنجش دونوں ہی پہلوؤں کو لے کر تفتیش کررہی ہے۔پولیس نیہا کے موبائل فون کی تفصیل بھی کھنگال رہی ہے۔وہیں پولیس اب اس بات کا بھی پتہ لگانے میں مصروف ہے کہ نیہا کے گھر کن کن لوگوں کا آنا جاناتھا۔
نہیا کے پڑوس میں رہنے والے لوگوں سے پوچھ گچھ کے دوران پولیس کو اس بات کا پتہ چلاہے کہ نیہا کے گھر کافی لوگوں کا آنا جانا لگارہتاتھا۔ نیہا کی لاش جن حالات میں پائی گئی ہے اس سے بھی اس بات کی پوری امید ہے کہ قتل کو انجام دینے والے نیہا کے جاننے والے ہی تھے۔کمرے سے پولیس کو تاش کی گڈی اور سگریٹ کے ٹکڑے بھی ملے ہیں ۔پولیس اب سرویلانس کی مدد سے ان تمام لوگوں کے بارے میں معلومات جمع کررہی ہے جن کا نیہا سے ملنا جلنا تھا۔پولیس کا کہناہے کہ کال تفصیل اور سرویلانس کی مدد سے جلد ہی پولیس قاتلوں تک پہنچ جائے گی۔دبی زبان میں محلے کے لوگوں نے کافی کچھ پولیس کو بتایا ہے۔پولیس اسی بنیاد پر تفتیش کررہی ہے ۔
