فٹبال ورلڈ کپ کے سات میچوں کے اوقات تبدیل

زیورخ ۔برازیل میں شیڈول فیفا ورلڈ کپ میں انگلینڈ اور چار مرتبہ کے چمپئن اٹلی کے درمیان میچ سمیت سات مقابلوں کا وقت تبدیل کردیا گیا۔ 15جون کو برازیل کے وقت کے مطابق دو بجے ہونے والا میچ تین گھنٹے قبل ہوگا۔براڈ کاسٹرز نے پچھلے اوقات کو نامناسب قرار دیا تھا جس پر فیفا نے ان ممالک کے ساتھ مشاورت کے بعد میچ کا وقت تبدیل کردیا۔فٹبال کی عالمی تنظیم فیفا نے ورلڈکپ 2014 کیٹکٹس کی آن لائن فروخت شروع کردی ہے۔ دوسرے مرحلے میں ٹکٹس فروخت ہونے کے 24گھنٹے کے اندر حکام کو تقریباً 12لاکھ درخواستیں موصول ہوئی ہیں۔
میگا ایونٹ کا آغاز آئندہ برس 12جون سائوپالو میں میزبان ملک برازیل اور کروشیا کے درمیان میچ سے ہوگا۔ دریں اثنا دنیا کے سیر پر نکلی ہوئی فیفا ورلڈ کپ ٹرافی سعودی عرب سے متحدہ عرب امارات پہنچ گئی،ٹرافی عالمی ٹور کے دوران 90ممالک کا دورہ کرے گی۔ دبئی میں ٹرافی کی نمائش 15 اور 16دسمبرکو مقامی ہوٹل میں ہوگی۔ قبل ازیں سعودی دارالحکومت ریاض ایئرپورٹ پرفیفا ورلڈ کپ کی ٹرافی خصوصی طیارے کے ذریعے لائی گئی جس کا مقامی حکام نے استقبال کیا۔