بالی وڈ اداکار نواز الدین صدیقی کا کہنا ہے کہ انہیں بولی وڈ کے تینوں خان شاہ رخ، عامر اور سلمان کے ساتھ اداکاری کرنا پسند ہے کیوں کہ تینوں میں مختلف اچھی عادتیں ہیں۔این ڈی ٹی وی سے بات کرتے ہوئے نواز الدین کا کہنا تھا کہ 10 سے 12 سال کی جدوجہد نے انہیں بہت کچھ سکھایا ہے، انہوں نے اپنی ناکامی کے دور میں لوگوں اور وقتوں کو بدلتے دیکھا ہے اور آج وہ اپنی محنت کی وجہ سے اس مقام پر موجود ہیں.نواز الدین کا کہنا تھا کہ ان کی حال ہی میں ریلیز فلم ‘منجھی دی ماؤنٹین ان کی زندگی کی سب سے مشکل ترین فلم ثابت ہوئی ہے جس میں انہیں بے انتہا محنت کرنی پڑی۔
نواز الدین صدیقی نے بولی وڈ کے مشہور خان شاہ رخ، عامر اور سلمان تینوں کے ساتھ ہی اداکاری کی ہے جس پر ان کا کہنا تھا کہ اب ان میں سے کوئی ایک ان کے پسندیدہ نہیں بلکہ تینوں ہی کے ساتھ اداکاری کرنا پسند ہے۔اس حوالے سے ان کا کہنا تھا کہ تینوں میں الگ الگ خصوصیات موجود ہیں، شاہ رخ کافی عاجزی والے ہیں، سلمان کافی بے فکر جبکہ عامر پرفیکٹ ہیں۔ان کا مزید کہنا تھا کہ تینوں ہی کو ایک دوسرے سے خوف نہیں اور وہ مستقبل میں بھی ان کے ساتھ اداکاری کرنا چاہیں گے۔وہیں اداکار نواز الدین صدیقی کا کہنا ہے کہ وہ اس بات سے بہت ڈرتے ہیں کہ کہیں شہرت ان کے اندر کے اداکار کو گم نہ کر دے۔ان کا کہنا ہے کہ میں نے یہ سوچا بھی نہیں تھا کہ میں شہرت کے اس مقام تک پہنچ جائوں گا جہاں میں آج کھڑا ہوں۔ تاہم میں یہ نہیں چاہتا کہ میری شہرت کا اثر میری اداکاری پر ہو۔
