ممبئی: نامور بھارتی اداکار نانا پاٹیکر جنہوں نے بالی ووڈ کی لاتعداد فلموں میں اپنی اداکاری کے جوہر دکھائے ہیں، اپنی نئی فلم میں ہدایتکار کے طور پر سامنے آئیں گے۔ نانا پاٹیکر نے اس حوالے سے بتایا ہے کہ وہ بطور ہدایتکار ایک بائیو گرافک فلم بنا رہے ہیں۔ انہوں نے کہا کہ فلم میں مرکزی کردار ایک لڑکی کا ہو گا تاہم انہوں نے اس کا نام بتانے سے گریز کیا۔ ان کا کہنا تھا کہ فلم کی لوکیشن کے لئے وہ جلد کھٹمنڈو روانہ ہوں گے۔ نانا پاٹیکر نے بتایا کہ وہ جلد ہی اپنے پروڈکشن کا آغاز بھی کریں گے جس کے انتظامات ان کے بیٹے کے حوالے ہوں گے۔
ان کا کہنا تھا کہ ایسی بہت سی فلم ہیں جنہیں وہ بنانا چاہتے ہیں اور اسی لئے انہوں نے اپنا پروڈکشن ہاوس بنانے کا فیصلہ کیا ہے۔ نانا پاٹیکر نے کہا کہ وہ زیادہ تر سنجیدہ فلمیں بنانے کے خواہاں ہیں۔ انہوں نے مزید بتایا کہ یہ ضروری نہیں کہ اپنے پروڈکشن ہاوس کی بنائی ہوئی ہر فلم کا میں حصہ ہوں گا تاہم ضرورت کے مطابق میں فلموں میں اداکاری ضرور کروں گا۔ ایک سوال کے جواب میں انہوں نے کہا کہ وہ ابھی تک اداکاری کے شعبے سے الگ نہیں ہوئے، مستقبل میں بھی اداکری کرتے رہیں گے۔
–
