بولی وڈ اداکار شاہ رخ خان سمیت ان کی فلم ’دل والے‘ کی پوری ٹیم اس وقت حیدر آباد میں فلم کی شوٹنگ کے لیے موجود ہے جہاں ہندوستانی ٹینس کھلاڑی ثانیہ مرزا نے انہیں خاص بریانی کی دعوت دی۔
اداکار ورن دھون نے سماجی رابطے کی ویب سائٹ توئٹر پر اداکار شاہ رخ خان، بومن ایرانی اور فرح خان کا بریانی کے لیے شکریہ ادا کیا۔
ورن کی ٹویٹ کے بعد کوریو گرافر فرح خان کا ٹویٹ میں کہنا تھا کہ ہمیں اس مزیدار بریانی کے لیے ثانیہ مرزا اور ان کی بہن انعم مرزا کا شکریہ ادا کرنا چاہیے جنہوں نے پوری ٹیم کے لیے بریانی بھیجی۔
ٹینس کھلاڑی ثانیہ مرزا کا فرح خان کی ٹویٹ کو سراہتے ہوئے کہنا تھا کہ وہ ان کی ٹیم کے لیے مزید بریانی بھیج سکتی ہیں۔
روہت شیٹی کی ہدایت میں بننے والی فلم ’دل والے‘ میں شاہ رخ خان کے ہمراہ کاجول، ورن دھون اور کریتی سنن اہم کردار کرتے نظر آئیں گے۔
’دل والے‘ اس سال 18 دسمبر کو ریلیز کی جائے گی۔
