قد بڑھانے میں معاون ہے پنیر

ایمسٹرڈیم؛ماہرین نے اس بات پر تحقیق کی کہ نیدر لینڈ جسے ہالینڈ بھی کہتے ہیں ، کے لوگوں کا قد باقی اقوام سے لمبا کیوں ہے۔یہ بات مشہور ہے کہ ہالینڈ کے لوگ پنیر بہت زیادہ کھاتے ہیں اور دلچسپ بات یہ ہے کہ پنیر کے استعمال سے ڈچ قوم اس وقت دنیا کی قدرآور ترین قوم بن چکی ہے۔ایک رپورٹ کے مطابق دودھ ، دہی اور پنیر جیسی غذائیں ڈچ قوم کی روزمرہ خوراک ہی نہیں بلکہ ان کے لیے قومی علامتوں کی حیثیت رکھتی ہے۔نیدر لینڈ میں دودھ سے بنی غذائیں برطانیہ ، امریکہ اور جرمنی جیسے ممالک کی نسبت بھی فی کس 25فیصد زیادہ استعمال کی جاتی ہیں۔اس ملک میں مقبول ترین ناشتہ ، پنیر ڈبل روٹی اور دودھ ہے اور صبح کے وقت میٹرو میں سفر کرتے لوگ پنیر سینڈوچ دودھ کے ساتھ کھاتے نظر آتے ہیں۔تقریباً ڈیڑھ صدی قبل ڈچ قوم یورپ میں سب سے چھوٹے قد والی قوم تھی لیکن پچھلے ڈیڑھ سو سال کے دوران انہوں نے پنیر اور دودھ کا مستقل استعمال کیا اور آج یہ یورپ ہی نہیں بلکہ پوری دنیا میں سب سے لمبے قد والی قوم ہے۔نیدر لینڈ میں خواتین کا اوسط قدم 5فٹ 7انچ اور مردوں کا اوسط قد 6فٹ سے زائد ہے اور ماہرین کا کہناہے کہ اس کے پیچھے پنیر جیسی مصنوعات کا کافی عمل دخل ہے۔