ہرارے: تیسرے اور فیصلہ کن ون ڈے میں پاکستان نے میزبان زمبابوے کو 7 وکٹوں سے شکست دے کر تین میچز پر مشتمل سیریز 1-2 سے اپنے نام کرلی۔ زمبابوے کے ہرارے اسپورٹس کلب میں کھیلے گئے فیصلہ کن میچ میں زمبابوے نے پاکستان کو جیت کے لئے 162 رنز کا ہدف دیا جس کے جواب میں قومی ٹیم نے محتاط انداز اپناتے ہوئے ہدف 34 اوورز میں حاصل کرلیا۔ پاکستان کی جانب سے بلال آصف اور احمد شہزاد نے اننگز کا آغاز کیا اور 58 رنز کا عمدہ آغاز فراہم کیا. نوجوان بلال آصف 1 چھکے اور 6 چوکوں کی مدد سے 38 رنز بنا کر آوٹ ہوئے جب کہ احمد شہزاد نے 32 اور محمد حفیظ نے 13 رنز کی اننگز کھیلی۔ اس سے قبل پاکستانی کپتان سرفراز احمد نے ٹاس جیت کر پہلے بیٹنگ کی دعوت دی، زمبابوے نے پہلے بیٹنگ کی اور 39ویں اوور میں پوری ٹیم 161 رنز پر پویلین لوٹ گئی، چھمو چھی بھابھا اور رچمنڈ متمبامی نے ٹیم کو 89 رنزکا عمدہ آغاز فراہم کیا مگر بلال آصف نے ان کی پارٹنرشپ کو توڑتے ہوئے چھی بھابھا کو 48 رنز پرآوٹ کیا اور اس کے بعد سین ولیمس کو 5 رنز، سکندر رضا کو 2 اور کپتان ایلٹن کو بغیر کوئی رنز بنائے پویلین بھیج دیا، بی بی چھاری بھی 4 رنز بنا کر عماد وسیم کا نشانہ بنے اور بلال آصف نے موتم بوزی کو 4 رنز پر بولڈ کر کے اپنے کیرئیر کے دوسرے میچ میں ہی 5 وکٹیں حاصل کیں جب کہ اوپننگ بیٹسمین رچمنڈ متمبامی اور محمد عرفان کے درمیان دلچسپ مکالمہ جاری رہا اس دوران رچمنڈ باونسر لگنے سے گر پڑے مگر وہ کریز پر موجود رہے تاہم 67 رنز پر عرفان نے انہیں کپتان سرفراز کے ہاتھوں آوٹ کروا دیا اور اس کے بعد کوئی بھی کھلاڑی وکٹ پر زیادہ دیر نہ رک سکا. میک کولم والر 8، پانیانگرا کو صفر رنز پر عماد وسیم کا نشانہ بنے جب کہ آخری وکٹ شعیب ملک کے حصے میں آئی۔ پاکستان کی جانب سے دوسرا میچ کھیلنے والے بلال آصف نے 5، نوجوان کھلاڑی عماد وسیم 3، محمد عرفان اور شعیب ملک نے ایک ایک وکٹ حاصل کی۔ قبل ازیں پاکستان کے کپتان سرفراز احمد نے ٹاس جیت کرزمبابوے کو پہلے بیٹنگ کی دعوت دی۔
سرفراز احمد کا کہنا تھا کہ اظہر علی انجری کے باعث آج کا میچ نہیں کھیل رہے جب کہ احمد شہزاد اور عماد وسیم کی ٹیم میں واپسی ہوئی ہے۔ دوسری جانب زمبابوے کے کپتان ایلٹن چگمبورا کا کہنا تھا کہ پہلی اننگ بیٹنگ کے لئے اچھی ہے، کوشش ہو گی کہ پاکستان کو بڑا ٹارگٹ دیں، میزبان ٹیم میں بھی 2 تبدیلیاں کی گئی ہیں۔ واضح رہے کہ 3 ایک روزہ میچوں کی سیریز کے پہلے میچ میں پاکستان نے زمبابوے کو شکست دی تھی جب کہ دوسرے میچ میں زمبابوے نے ڈک ورتھ لوئس میتھڈ کے ذریعے پاکستان کو 5 رنز سے شکست دی تھی۔
