زوکربرگ کو بے صبری سے پھر تاج کا دیدار کرنے کی چاہت

آگرہ: فیس بک کے بانی اور چیف ایکزیکٹیو افسر (سی ای او) مارک زوکربرگ تاج محل کے حسن کے دیوانے ہوچکے ہیں اور بے صبری سے پھر تاج کا دیدار کرنے کے لمحہ کا انتظار کررہے ہیں۔27اکتوبر کو یہاں آکر تاج محل کا دیدار کرنے والے زوکربرگ نے فیس بک پر اپنی تاج محل کے دیدار والی ایک فوٹوشے ئر کی ہے ۔ تاج محل کے گلیارے میں ٹہلتے ہوئے ان کی اس تصویر پر اب تک تقریباََ چھ لاکھ سے زائد ‘لائکس’ اور آٹھ ہزار پانچ سو سے زائد کمنٹ مل چکے ہیں ۔ چار ہزار چھ سوسے زائد لوگوں نے ان کی تصویر شے ئر کی ہے ۔فیس بک کے بانی نے اس فوٹوکے ساتھ اپنے پوسٹ میں لکھا ہے کہ تاج دورہ کی آخری تصویروں میں سے ایک۔ میں تاج کے دیدارکرنے کے لئے پھر سے آگرہ آنے کے لمحہ کا انتظارنہیں کر پارہا ہوں۔خیال رہے کہ گزشتہ ہفتہ ہندوستان دورہ کے دوران اپنے مصروف پروگرام سے وقت نکال کر زوکربرگ 27اکتوبر کو اچانک مغل بادشاہ شاہجہاں اور بیگم ممتاز محل کی بے پناہ محبت کی یادگار تاج محل کا دیدار کرنے کے لئے آگرہ پہنچے تھے ۔ اس کے بعد انہوں نے اپنے فیس بک اکاونٹ پر تاج محل میں گزارے لمحوں کی فوٹو شے ئر کی تھی۔دنیا کے سات عجوبوں میں شمار تاج کو اب تک تقریباََ 12لاکھ 90ہزارلوگ لائک کرچکے ہیں۔