شیوپور میں باراتیوں سے بھری ٹرالی حادثے کا شکار، تین ہلاک

شیوپور:مدھیہ پردیش کے شیوپور ضلع میں قبائلی کمیونٹی سہریا کے باراتیوں سے بھری ایک ٹرالی پلٹنے سے اس میں سوار تین نوجوانوں کی موت ہو گئی۔ حادثے میں نو افراد زخمی ہوئے ہیں، جنہیں ضلع اسپتال میں داخل کرایا گیا ہے ۔ ڈھوڈھر تھانہ پولیس نے آج بتایا کہ کل رات تقریبا ساڑھے 11 بجے ایک ٹرالی میں سوار ہوکر جھریر گاؤں سے سہریا قبیلے کی بارات پاتال گڑھ جا رہی تھی۔ اسی دوران ضلع ہیڈکوارٹر سے تقریبا 65 کلومیٹر دور واقع پاتال گڑھ گاؤں سے عین پہلے ٹرالی بے قابوہوکر پلٹ گئی۔ انہوں نے بتایا کہ حادثے میں ٹرالی میں سوار تین نوجوانوں کی جائے حادثہ پر ہی موت ہو گئی۔ تینوں کی عمر تقریبا 20 سے 22 کے درمیان ہے ۔ حادثے میں دیگر9 نوجوان زخمی ہیں۔ ٹرالی میں صرف مرد ہی سوار تھے ۔