متھرا تشدد کا مفرور ملزم چندن بوس گرفتار

بستی: اترپردیش میں متھرا کے جواہر باغ تشدد کے ملزم اور رام ورکش یادو کے قریبی چندن بوس کو پولیس نے آج بستی کے پرشورام پور علاقے سے گرفتار کر لیا۔پولیس ذرائع نے بتایا کہ متھرا تشدد کے ملزم چندن بوس کو ضلع ہیڈکوارٹر سے تقریبا 52 کلومیٹر دور پرشورام پور علاقے میں اس کے سسرال سے گرفتار کیا گیا۔ انہوں نے بتایا کہ 02 جون کو متھرا کے جواہر باغ میں ہوئے تشدد کے بعد چندن بوس فرارہو کر اپنی سسرال میں چھپ کر رہ رہا تھا۔ انہوں نے بتایا کہ پکڑے گئے ملزم کو بستی ضلع ہیڈکوارٹر لایا جا رہا ہے ۔ واضح رہے کہ گذشتہ دو جون کو متھرا کے جواہر باغ میں مبینہ ستیہ گرہ کرنے والوں کو ہٹانے گئی پولیس فورس پر انہوں نے فائرنگ کی تھی جس میں پولیس کے دو افسران شہید ہو گئے تھے ۔ اس واقعہ میں رام ورکش یادو سمیت 27 لوگوں کی بھی موت ہوئی تھی۔