عراقی فوج نے الحویجہ کو داعش کے قبضے سے آزادی ہونے کا کیا اعلان

عراقی حکام کا کہنا ہے کہ بدنام زمانہ دہشتگرد ٹولے داعش کے قبضے سے الحویجہ کو مکمل طورپر آزاد کرالیا گیا ہے۔ عراقی فوج نے سرکاری سطح پر عراق کے صوبہ کرکوک کے مغربی شہرالحویجہ کی دہشت گردوں کے قبضے سے مکمل طور پر آزادی کا اعلان کیا ہے.

عراقی رضاکار فورس حشدالشعبی کے کمانڈرعبدالامیر یارالله نے کہا کہ الحویجہ شہر کو داعش کے دہشت گردوں سے مکمل طورپر آزاد کرالیا گیا ہے۔

حشدالشعبی کے کمانڈر کا کہنا تھا کہ عراقی فوج اور رضاکار فورسز نے مغربی کرکوک میں داعش کے خلاف آپریشن کو پایہ تکمیل تک پہنچایا ہے اور اب یہ علاقہ انسانیت کے دشمن اور انسان نما درندوں سے مکمل طور پر پاک ہوچکا ہے۔

انہوں نے کہا کہ سیکورٹی فورسز نے مغربی کرکوک کے الریاض نامی علاقے سمیت 161 دیہاتوں کو داعش کے درندوں سے آزاد کرالیا ہے۔

حشد الشعبی کے کمانڈر کا کہنا تھا کہ الحویجہ کی آزادی کے بعد دہشت گردوں کے حوصلے پست ہوگئے ہیں اور عراقی فوج اب نہایت آسانی کے ساتھ تمام علاقوں سے دہشت گردوں کا خاتمہ کرے گی۔