ممبئی ۔حال ہی میں بالی وڈ فلم رام لیلا میں اپنی لاجواب اداکاری سے مداحوں کو دیوانہ بنانیوالے رنویر سنگھ کو آدتیہ چوپڑا کی اگلی فلم میں شاہ خان کی جگہ کاسٹ کر لیا گیا ہے۔ یش راج پروڈکشن سے اپنے فلمی کیرئیر کا آغاز کرنیوالے بالی وڈ کے ابھرتے ہوئے اداکاررنویر سنگھ کی نئی فلم غنڈے بھی ریلیز کیلئے تیار ہے جس کو آدتیہ چوپڑا پروڈیوس کر رہے ہیں۔ فلم میں رنویرنے اپنی پرفارمنس سے آدتیہ کو اس قدر متاثر کیا ہے کہ انہوں نے اپنی نئی فلم میں شاہ رخ خان پر رنویر کو ترجیح دیتے ہوئے فلم میں کاسٹ کر لیا ہے۔دوسری جانب یش راج بینر تلے پر ینکا چوپڑا، رنویر سنگھ اور ارجن کپور کی رومانٹک ایکشن ڈرامہ فلم”غنڈے”کے ٹریلر کے بعد فلم کے آئٹم سونگ “اسلامِ عشقم”کی ویڈیو بھی جاری کر دی ہے۔ اس گانے کو بالی ووڈ کے مایہ ناز گلو کار بپی لہری اور نیہا بھاسن کی آواز میں ریکارڈ کیا گیا ہے جس میں ڈانس کرتی پر ینکا چوپڑا اپنی اداؤں اور خوبصورتی سے چار چاند لگارہی ہیں جبکہ ان کے ساتھ رنویر سنگھ اور ارجن کپوربھی رقص کرتے نظر آرہے ہیں۔ہدایتکار علی عباس ظفر کی اس فلم کو آدتیہ چوپڑا نے پروڈیوس کیا ہے جس میں رنویر اور ارجن کے مدِ مقابل پگی چاپس پر ینکاچوپڑابحیثیت ہیروئن جلوہ گر ہورہی ہیں جبکہ عرفان خان بھی اہم کردارمیں نظر آئینگے۔فلم غنڈے کی کہانی دو نوجوانوں کے گرد گھومتی ہے جنہوں نے جرائم کی دنیا میں اپنی بہترین ساکھ قائم کررکھی ہے۔ایکشن،تھرل اور رومانس سے بھرپور یہ فلم غنڈے یش راج فلمز کے تحت
رواں سال۱۴فروری کو سینما گھروں کی زینت بنے گی جسکا میوزک سہیل سین نے ترتیب دیا ہے۔
