خطرناک نکسلی جتیندربھوئیاں گرفتار

اورنگ آباد : بہار میں نکسلی انتہاپسندی سے متاثرہ اورنگ آباد ضلع کے ڈھیبرا تھانہ حلقہ کے لیلجی گاؤں سے پولیس اور مرکزی نیم فوجی دستوں کی مشترکہ کارروائی میں ممنوعہ نکسلی تنظیم ہندستان کی کمیونسٹ پارٹی (ماؤنواز)کے خطرناک نکسلی جتیندر بھوئیاں کو آج گرفتارکرلیاگیا۔

پولیس ذرائع نے یہاں بتایا کہ اطلاع کی بنیاد پر ماؤنواز جتیندر بھوئیاں کو لیلجی گاؤں میں ایک ٹھکانہ سے گرفتارکیاگیا۔

پولیس کو جتیندر کی طویل عرصہ سے تلاش تھی اور وہ کئ برسوں سے نکسلیوں کے مسلح دستہ میں شامل تھا۔ذرائع نے بتایاکہ گرفتارنکسلی مدن پور تھانہ حلقہ میں پولیس نکسلی مڈبھیڑ کے علاوہ ٹنڈوا علاقہ میں پولیس جیپ کو دھماکہ سے اڑانے کے واقعہ میں شامل رہاہے جس میں اس وقت کے تھانہ انچارج سمیت 9پولیس جوانوں کی موت ہوگئی تھی۔اس کے علاوہ گرفتارماؤنواز کئی دیگر نکسلی واقعات میں بھی شامل رہاہے ۔گرفتار نکسلی سے پوچھ گچھ جاری ہے ۔