سڑک حادثے میں استادسمیت سات طلباء ہلاک

 قنوج: اترپردیش میں ضلع قنوج میں آج صبح لکھنؤ ۔ آگرہ ایکسپریس وے پر ایک بس نے نو افراد کو کچل دیا جس کے نتیجے میں استاد سمیت سات طلباء کی موت اور دو دیگر افراد زخمی ہوگئے ۔

پولیس کے ذرائع کے مطابق سنت کبیر نگر ضلع کے خلیل آباد علاقے سے بی ٹی سی کے طلبا؍ بس میں سوار ہوکر پکنک منانے ہری دوار جارہے تھے اسی دوران لکھنؤ ۔ آگرہ ایکسپریس وے پر بس کا ڈیزل ختم ہوگیا اورکچھ طالب علم دیگر افراد کے ساتھ بس سے نیچے اتر کر سڑک پر کھڑے ہوگئے تبھی تقریباً صبح تین بجے ایک تیز رفتار روڈویز بس نے سڑک پر کھڑے لوگوں کو اپنی زد میں لے لیا ۔ اس حادثے میں استاد وجے کمار کے علاوہ مہیش کمار گپتا، ابھے پرتاپ سنگھ،متھلیش کمار اور وشال کمار سمیت چھ افراد کی موقع پر ہی موت ہوگئی جبکہ ایک زخمی نے اسپتال کے راستے میں دم توڑ دیا۔
انہوں نے بتایا کہ حادثے میں زخمی دو افراد کو اسپتال میں داخل کرادیا گیا ہے جس میں ایک کی حالت تشویشناک ہے ۔