دھونی کو چمپئن بنانے والے کھلاڑی نے خریدا 47 کروڑ کا عالیشان گھر ، وراٹ کو بھی چھوڑا پیچھے

ٹیم انڈیا کے کپتان وراٹ کوہلی کے گھر نے ابھی حال ہی میں کافی سرخیاں بٹوری تھیں ۔ شادی کے بعد وراٹ کوہلی اپنی اہلیہ اداکارہ انوشکا شرما کے ساتھ ممبئی کے ایک عالیشان اپارٹمنٹ میں شفٹ ہوئے تھے ۔ اس اپارٹمنٹ کی قیمت 34 کروڑ تھی ۔ حالانکہ اب دھونی کو آئی پی ایل چمپئن بنانے والے کھلاڑی نے وراٹ کوہلی سے بھی مہنگا گھر خرید لیا ہے ۔

ہم بات کررہے ہیں شین واٹسن کی ، جنہوں نے سڈنی کے مشرقی کنارے پر ایک عالیشان گھر خریدا ہے ، جس کی قیمت 47 کروڑ روپے بتائی جارہی ہے ۔ واٹسن کا یہ گھر تقریبا 90 سال پرانا ہے ، لیکن اس کی لوکیشن زبردست ہے ۔ چار بیڈ روم والے اس عالیشان گھر میں رینوویشن کا کام جاری ہے ۔

آپ کو بتادیں کہ شین واٹسن آسٹریلیا کی ٹیم سے باہر ہیں ، لیکن انہوں نے حال ہی میں انڈین پریمیئر لیگ کے 11 ویں سیزن میں چنئی سپرکنگس کے لئے شرکت کی تھی ۔ واٹسن نے فائنل میں 117 رن بناکر چنئی کو تیسری مرتبہ آئی پی ایل چمپئن بنایا تھا ۔

ویسے شین واٹسن ہی نہیں آسٹریلیا کے دوسرے کھلاڑیوں کو بھی مہنگے گھر خریدنے کا شوق ہے ۔ آسٹریلیا کے سابق کپتان اسٹیون اسمتھ اور سابق نائب کپتان ڈیوڈ وارنر بھی آسٹریلیا میں کئی گھر خرید چکے ہیں ۔ اسمتھ کے آسٹریلیا میں سات گھر ہیں تو وہیں وارنر اور ان کی سپرماڈل اہلیہ کینڈیس بھی چھ عالیشان گھروں کے مالک ہیں۔