آتش بازی فیکٹری میں دھماکہ، 8 ہلاک تین زخمی

بدایوں ؍ کم از کم 8 افراد ہلاک اور دیگر 3 شدید زخمی ہوگئے جبکہ ایک پٹاخہ کارخانہ میں 4 بجے شام دھماکہ ہوا۔ یہ ایک لائسنس یافتہ پٹاخہ کارخانہ تھا جو رسول پور دیہات میں واقع تھا۔ ایس ایس پی اشوک کمار نے کہا کہ 7 افراد برسرموقع ہلاک ہوگئے جبکہ ایک شخص دواخانہ میں زخموں سے جانبر نہ ہوسکا۔ دیگر 3 افراد شدید زخمی اور ضلع ہاسپٹل میں زیرعلاج ہیں۔

دھماکہ کی شدت اتنی طاقتور تھی کہ متصلہ سیکل کی دکان میں بیٹھے ہوئے افراد اور راہگیر بھی زخمی ہوئے۔ ضلع انتظامیہ نے فائر بریگیڈ اور تخلیہ کرانے والوں کی خدمات حاصل کیں۔ چیف منسٹر نے اس واقعہ کا فوری نوٹ لیتے ہوئے ضلع مجسٹریٹ بدایوں کو تمام ضروری اقدامات کرنے اور زخمیوں کو راحت رسانی کی ہدایت دی ہے۔ ایسے واقعات کا اعادہ نہ ہونے دینے کیلئے تمام ضروری احتیاطی اقدامات کئے گئے ہیں۔