’اس پوری دنیا میں میری برابری کی ایک ہی تو ہے‘

بولی وڈ کی رواں سال ریلیز ہونے والی فلم ’زیرو‘ کا مداحوں کو بےصبری سے انتظار ہے، جس کی ایک وجہ تو صرف یہی ہے کہ اس فلم میں شاہ رخ خان مرکزی کردار ادا کرتے نظر آئیں گے۔

فلم ’زیرو‘ میں شاہ رخ خان ایک چھوٹے قد کے آدمی (بونے) کا کردار ادا کرتے نظر آئیں گے، جس میں ان کے ہمراہ اداکارہ کترینہ کیف اور انوشکا شرما مرکزی کردار ادا کررہی ہیں۔

ویسے تو فلم میں شاہ رخ خان کا لک گزشتہ سال سامنے آئے ٹیزر اور پوسٹرز کے ذریعے ہی منظر عام پر آگیا تھا، تاہم مداحوں کو فلم میں انوشکا اور کترینہ کے لک کی جھلک دیکھنے کا انتظار تھا۔

اور اب فلم ساز نے انوشکا اور کترینہ کے کرداروں کے پوسٹرز بھی ریلیز کردیے ہیں۔

شاہ رخ خان نے اپنے ٹوئٹر پر انوشکا شرما کا پوسٹر شیئر کرتے ہوئے لکھا کہ ’اس پوری دنیا میں میری برابری کی ایک ہی تو ہے‘۔

اس پوسٹر میں انوشکا ویل چیئر پر نظر آئیں، جبکہ شاہ رخ ان کے برابر موجود ہیں، انوشکا کی تصویر دیکھ کر اس بات کا بھی اندازہ ہوگیا کہ وہ فلم میں معذور لڑکی کا کردار ادا کررہی ہیں۔

دوسری جانب شاہ رخ نے کترینہ کیف کا پوسٹر شیئر کرکے بھی مداحوں کو حیران کردیا۔

اس پوسٹر کے ساتھ اداکار نے لکھا کہ ’ستاروں کے خواب دیکھنے والوں، ہم نے تو چاند کو قریب سے دیکھا ہے‘۔