رنویر اور دپیکا نے 24 گھنٹے بعد شادی کی تصاویر شیئر کردیں

بولی وڈ کے رومانٹک جوڑے رنویر سنگھ اور دپیکا پڈوکون نے یوں تو 14 نومبر کو شادی کی تھی۔

تاہم ان دونوں نے 15 نومبر کو بھی دوبارہ شادی کی۔

دونوں نے پہلے دن کونکنی اور دوسرے دن سندھی روایات کے مطابق اٹلی کے معروف سیاحتی مقام لوک کومو کے ایک پر تعیش ریزورٹ کے قریب شادی کی۔

ان کی شادی دیگر شخصیات کی شادیوں سے اس لیے بھی منفرد تھی کہ ان کی تصاویر سامنے نہیں آئی تھیں۔

حیران کن بات یہ ہے کہ جوڑے نے اپنی شادی کی تصاویر پہلے دن تو دور دوسرے دن کی سہ پہر تک بھی جاری نہیں کی تھی۔

تاہم 15 نومبر کی شام کو جوڑے نے اپنے مداحوں سے شادی کی پہلی تصاویر شیئر کیں۔

رنویر سنگھ اور دپیکا پڈوکون نے اپنے اپنے سوشل میڈیا اکاؤنٹس پر ایک جیسی 2 تصاویر شیئر کیں، جن میں دونوں کو انتہائی خوش دیکھا گیا۔

دونوں نے شادی کی دونوں رسومات کی تصاویر شیئر کیں، جن میں انہیں کونکنی اور سندھی روایتی شادیوں کے لباس میں دیکھا جا سکتا ہے۔

کونکنی شادی کی رسم میں رنویر سنگھ سفید لباس میں نظر آئے جب کہ سندھی روایات کے مطابق کی جانے والی شادی میں دونوں سرخ لباس میں ںظر آئے۔