پھر تنازع کا شکار ہوا پاکستان – جنوبی افریقہ ٹیسٹ ، ٹویٹر پر لوگوں نے ٹی وی امپائر کو بتایا پروٹیز کا بارہواں کھلاڑی

پاکستان اور جنوبی افریقہ کے درمیان کیپ ٹاون میں کھیلا جارہا دوسرا ٹیسٹ میچ بھی تنازع کا شکار ہوگیا ہے ۔میچ کے دوسرے دن پہلے سیشن کے دوران تھرڈ امپائر نے فیلڈ امپائر کے ایک فیصلہ کو پلٹ دیا ، جس کے بعد ایک مرتبہ پھر تنازع کھڑا ہوگیا ہے ۔ سوشل میڈیا پر پاکستانی کرکٹ شائقین تھرڈ امپائر کے فیصلہ کی تنقید کررہے ہیں ۔

دراصل محمد عباس کی گیند پر جنوبی افریقہ کے بلے باز ٹیمبا باووما کا ایک کیچ اظہر علی کے پاس فرسٹ سلپ میں چلاگیا ، جس کو اظہر علی نے پکڑلیا ۔ تاہم کیچ پوری طرح صحیح سے پکڑا گیا یا نہیں ، اس کو لے کر فیلڈ امپائر نے تھرڈ امپائر سے پوچھا اور ساتھ میں ہی سافٹ سگنل آوٹ کا دیا۔

کئی مرتبہ ری پلے دیکھنے کے بعد تھرڈ امپائر نے فیلڈ امپائر کے فیصلہ کو بدل دیا اور جنوبی افریقہ کے بلے باز کو ناٹ آوٹ قرار دیا ۔فیلڈ امپائر کے فیصلہ کو بدلنے کی وجہ سے ٹویٹر صارفین تھرڈ امپائر کی جم کر تنقید کررہے ہیں ۔ ایک ٹویٹر یوزر نے تو تھرڈ امپائر کو پروٹیز کا بارہواں کھلاڑی تک کہہ ڈالا ۔
خیال رہے کہ یہ واقعہ بالکل ایسا ہی تھا جیسا کہ پہلے میچ کے دوران بھی پیش آیا تھا ۔ پہلے میچ میں بھی ٹھرڈ امپائر نے فیلڈ امپائرکے فیصلہ کو بدلتے ہوئے ڈین ایلگر کو ناٹ آوٹ قرار دیا تھا ۔ اس وقت بھی کیچ پکڑنےو الے اظہر علی ہی تھے ۔ مگرگیند بازی اس وقت شاہین شاہ آفریدی کررہے تھے ۔