پاسکو ایکٹ کے تحت ملزمان کو رحم کی درخواست سے محروم کرنا چاہیے : کووند

سروهي، 06 دسمبر (یواین آئی) صدر رام ناتھ كووند نے خواتین کی حفاظت پر شدید تشویش ظاہر کرتے ہوئے کہا ہے کہ پاسکو ایکٹ کے تحت آبروریزی کے ملزمان کو رحم کی درخواست سے محروم کر دینا چاہئے مسٹر كووند نے آج ابو روڑ میں برہما کماری ایشوریہ یونیورسٹی انسٹی ٹیوٹ میں خواتین کو بااختیار بنانے کے موضوع پر منعقد کانفرنس میں خطاب کرتے ہوئے یہ بات کہی۔

انہوں نے کہا کہ’خواتین کی حفاظت ایک سنگین مسئلہ ہےپاسکو ایکٹ کے تحت آبروریزی کے قصورواروں کو رحم کی درخواست دائر کرنے کا حق نہیں ہونا چاہئے۔اس طرح کا آئین میں ایک قانون ہے جس پر نظر ثانی ہونی چاہئے۔
پاسکو ایکٹ کے تحت ملزمان کو رحم کی درخواست سے محروم کر دینا چاہئے۔ انہوں نے کہا کہ یہ کام پارلیمنٹ کا ہے۔

انہوں نے خواتین کی تعلیم کے سلسلے میں تشویش ظاہر کرتے ہوئے کہا کہ آج بھی شرح خواندگی کم ہے، لیکن بیٹیوں کی تعلیم کے لئے کام ہو رہا ہے۔ راجستھان کے بانسواڑا جیسے قبائلی ضلع میں ہر ایک ہزار بیٹوں پر 1003 بیٹیاں پیدا ہونے کی بات سے فخر محسوس ہوتا ہے۔ انہوں نے جن دھن یوجنا کے تحت 52 فیصد اکاؤنٹ کھلنے پر خوشی کا اظہار کیا۔

انہوں نے کہا کہ اس بار پارلیمنٹ میں 78 خواتین رہنما کا ہونا فخر کی بات ہے۔مسٹر كووند نے کہا کہ خواتین کے تحفظ کی ذمہ داری پورے سماج کی ہے۔

واضح رہے کہ مسٹر كووند کا یہ بیان ایسے وقت آیا ہے جب حیدرآباد میں ایک ڈاکٹر کی آبروریزی کے بعد جلا کر مارنے اور اناؤ میں عصمت دری متاثرہ کو دن دہاڑے جلانے کے واقعہ سے ملک میں غصہ کا ماحول بنا ہوا ہے۔