گجرات کے پاٹن میں دردناک حادثہ، ایک کو بچانے کے چکر میں 5 افراد کی تالاب میں ڈوب کر موت

گجرات کے پاٹن ضلع میں ایک دردناک اور آنکھیں نم کر دینے والا واقعہ پیش آیا ہے۔ ضلع کے چانسما تحصیل کے وڈاولی گاؤں کے تالاب میں ڈوب جانے سے 5 لوگوں کی موت ہو گئی ہے۔ گاؤں کے ایک کنبہ کے کچھ فرد بکری چرانے کے لیے گئے تھے۔

دیر رات گھر واپسی کے وقت یہ کنبہ تالاب کے پاس سے گزر رہا تھا، تبھی اچانک ایک لڑکی کا پیر پھسل جاتا ہے اور وہ تالاب میں گر جاتی ہے۔

لڑکی کے تالاب میں گرتے ہی ساتھ چل رہی اس کی ماں اور بھائی اسے بچانے کے لیے ہڑبڑا کر تالاب میں کود جاتے ہیں۔ لیکن پانی کی گہرائی کا اندازہ نہ ہونے کی وجہ سے ایک-ایک کرکے کنبہ کے 3 اور دیگر 2 لوگ ڈوب جاتے ہیں۔ کنبہ کے تین رکن جس میں فیروزا ملک سمیت ان کے 2 بچے عبدل اور مہرہ کے ساتھ ساتھ گاؤں کی سمرن اور سہیل کی بھی اس حادثہ میں موت ہو گئی۔

واقعہ کے بعد وہاں پہنچے کچھ لوگوں نے تالاب کے باہر پڑی چپلوں سے اس حادثہ کا اندازہ لگایا۔ پتہ چلتا ہے کہ کوئی ڈوبا ہے، اس کے بعد گاؤں والوں نے پانچوں کو تالاب سے باہر نکالا اور چانسما کے کمیونٹی صحت مرکز لے گئے جہاں ڈاکٹروں نے ان پانچوں کو مردہ قرار دے دیا۔

پولیس افسر کے مطابق ان لوگوں کی بکریاں جھیل کے نزدیک چر رہی تھیں تبھی پانچوں میں سے ایک کا پیر پھسل گیا اور وہ تالاب میں گر گیا۔ دیگر لوگ بھی اسے بچانے کے لیے جھیل میں کود گئے اور ڈوب گئے۔ اس دردناک واقعہ کی خبر ملتے ہی پورے علاقے میں سوگ کی لہر دوڑ گئی ہے۔

قابل ذکر ہے کہ ایک مہینہ پہلے اتر پردیش کے کوشامبی ضلع میں بھی کچھ اسی طرح کا حادثہ پیش آیا تھا جب ایک ہی کنبہ کے 4 افراد پانی میں ڈوب گئے تھے۔ یہاں گنگا ندی میں نہاتے وقت 4 لوگ غرقاب ہو گئے اور ان کی موت ہو گئی۔